वीरगंज । वीरगंज महानगरपालिकाको आयोजनामा वीरगंजस्थित घडिअर्वा पोखरी कभर्डहलमा ‘चौथो नगर राष्ट्रपति रनिङ सिल्ड तेक्वान्दो छनोट प्रतियोगिता’ सम्पन्न भएको छ ।
कार्यक्रम गणेशमान श्रेष्ठको अध्यक्षता तथा पर्सा जिल्ला तेक्वान्दो सङ्घका अध्यक्ष दीपक साह कानुको प्रमुख आतिथ्यमा सम्पन्न भएको हो । प्रतियोगितामा करिब ३०० जना खेलाडी तथा खेलप्रेमीहरूको उल्लेख्य सहभागिता रहेको थियो ।
प्रतियोगितामा खेलाडीहरूको तौल समूह र प्रदर्शनका आधारमा विजेता घोषणा गरिएको थियो । पुरुष ४५ केजी तौल समूहमा गौतम कुमार प्रजापति प्रथम, जेनिस खड्का द्वितीय तथा मोहित लिम्बू र प्रणिल थापा तृतीय भएका छन् । ४८ केजी तर्फ आशिष कुमार सराफ प्रथम, विकी कुमार यादव द्वितीय तथा सुलभ थारु र सक्षम चौरसिया तृतीय भएका छन् ।
त्यसैगरी, ५१ केजी तौल समूहमा शिवजी कुमार पटेल प्रथम, अब्राहम भुजु द्वितीय तथा जानिलाल जाफर र आयुस चौधरी तृतीय बनेका छन् । ५५ केजी समूहमा स्वयममान रन्जितकार प्रथम र प्रिन्स कुमार द्वितीय भएका छन् । अन्य प्रतिस्पर्धामा शिवम कुमार प्रथम र शेख रहमान हुसेन द्वितीय भएका छन् ।
पुम्से (काटा) तर्फ पनि खेलाडीहरूले उत्कृष्ट प्रदर्शन गरेका छन् । एकल पुरुष पुम्सेमा हबिबुल्लाह मियाँ प्रथम, आगमन ठकुरी द्वितीय तथा साजन पटेल र आयुस ठकुरी तृतीय भएका छन् भने एकल महिला पुम्सेतर्फ रोशनी मोक्तान प्रथम हुन सफल भएकी छिन् ।
प्रतियोगितालाई निष्पक्ष र व्यवस्थित बनाउन जुरीको भूमिकामा महमद सकिल र गणेशमान श्रेष्ठ रहेका थिए । रेफ्रीतर्फ राजेन्द्र शाही, महमद मन्सुर हवारी, विक्रान्त डङ्गोल, सोएब अख्तर र दिपेश मानन्धरलगायतले जिम्मेवारी निर्वाह गरेका थिए ।
समापन कार्यक्रममा सभापति श्रेष्ठले प्रतियोगितामा उत्कृष्ट प्रदर्शन गर्ने खेलाडीहरूलाई आगामी प्रदेश स्तरीय प्रतियोगितामा सहभागी गराइने जानकारी दिएका छन् ।
