सेढवा । श्री कोडेक कृषि सहकारी संस्था लिमिटेड, सखुवा प्रसौनी गाउँपालिका–२, औराहा पञ्चगावाँको तेस्रो वार्षिक अधिवेशन सम्पन्न भएको छ । वडा सदस्य झपसी दुसादिनको प्रमुख आतिथ्यतामा कार्यक्रम सौहार्दपूर्ण वातावरणमा आयोजना गरिएको थियो ।
अधिवेशनमा सहकारीका सदस्यहरूले संस्थाको हालसम्मको प्रगति, आर्थिक अवस्था, सञ्चालन गतिविधि तथा आगामी योजनाबारे विस्तृत छलफल गरेका थिए । कुल २८ जना सदस्यको सहभागिता रहेको कार्यक्रममा सहकारीलाई अझ प्रभावकारी र व्यवस्थित बनाउने विषयमा विशेष जोड दिइएको थियो ।
अधिवेशनले आगामी कार्यकालका लागि ९ सदस्यीय नयाँ कार्यसमिति गठन गरेको छ । नवगठित समितिले सहकारीको संस्थागत विकास, किसानहरूको हित संरक्षण तथा उत्पादनमुखी कार्यक्रमहरूलाई प्राथमिकतामा राखेर अगाडि बढ्ने प्रतिबद्धता जनाएको छ ।
कार्यक्रममा सहभागी सदस्यहरूले सहकारीलाई सुदृढ, पारदर्शी र उत्तरदायी संस्थाका रूपमा विकास गर्न एकजुट भएर अघि बढ्ने अठोट व्यक्त गरेका छन्।
