वीरगंज । सूचना तथा सञ्चार प्रविधि दिवस–२०८३ को अवसरमा “सूचना प्रविधिको विस्तार: दिगो विकासको आधार” भन्ने मूल नारासहित वीरगंजमा एक दिवसीय साइबर सुरक्षा (Cyber Security) तालिम तथा कार्यशाला गोष्ठी सम्पन्न भएको छ ।
कम्प्युटर एशोसिएसन नेपाल (क्यान) महासंघ, पर्सा जिल्ला शाखाको आयोजनामा भएको उक्त कार्यक्रममा पछिल्लो समय बढ्दै गएको साइबर अपराध, अनलाइन ठगी तथा डिजिटल सुरक्षासँग सम्बन्धित चुनौतीहरूबारे केन्द्रित रही प्रशिक्षण प्रदान गरिएको थियो।
कार्यक्रम क्यान महासंघ पर्साका अध्यक्ष गणेश कुमारको सभापतित्वमा सम्पन्न भएको थियो । प्रमुख अतिथिका रूपमा प्रशान्त कुमारको उपस्थिति रहेको थियो भने कार्यक्रमको सञ्चालन प्रतिक्षा अधिकारीले गर्नुभएको थियो ।
कार्यक्रममा सूरज पटेल, रोशनी लामिछाने, प्रविण राज भण्डारी, राजेश थापा, निरञ्जन केशरी र प्रदिप कर्ण लगायतको सहभागिता रहेको थियो।
कार्यक्रमका वक्ताहरूले इन्टरनेट तथा सामाजिक सञ्जालको प्रयोग तीव्र रूपमा बढ्दै गइरहेको अवस्थामा साइबर सुरक्षासम्बन्धी ज्ञान र सचेतना अपरिहार्य बन्दै गएकोमा जोड दिएका थिए । उनीहरूले व्यक्तिगत तथा संस्थागत डेटा सुरक्षाका उपाय अपनाउन र अनलाइन गतिविधिमा सतर्क रहन आग्रह गरेका थिए ।
कार्यक्रम सफल बनाउन नेपाल डिजिटल एजुकेशन (NDE) र डायनामिक टेक्नोसफ्टले सहयोगी संस्थाका रूपमा सहकार्य गरेका थिए ।
