वीरगंज । पर्साको ठोरी गाउँपालिका वडा नं. १ मा “जनताको घरदैलोमा डाक्टर” कार्यक्रम सम्पन्न भएको छ । प्रभु अस्पताल वीरगंजकाे सहकार्य तथा नागरिक समाज ठोरीको आयोजनामा कार्यक्रम सञ्चालन गरिएको हो ।
कार्यक्रमअन्तर्गत १५९ महिला र १०० पुरुष गरी जम्मा २५० जनाको निःशुल्क स्वास्थ्य परीक्षण तथा औषधि वितरण गरिएको आयोजकले जनाएको छ । अस्पतालसम्म पुग्न नसक्ने गरिब, विपन्न तथा दुर्गम क्षेत्रका बिरामीलाई लक्षित गर्दै घरदैलोमै पुगेर उपचार तथा परामर्श सेवा प्रदान गरिएको हो ।
स्थानीय सन्तोष श्रेष्ठको समन्वय तथा प्रतिनिधिसभा सदस्य टेकबहादुर शाक्यको प्रमुख आतिथ्यमा कार्यक्रम सम्पन्न भएको थियो । कार्यक्रममा प्रभु अस्पताल वीरगंजका हाडजोर्नी तथा नसारोग विशेषज्ञ डा. प्रयास तिमल्सिना र डा. सुरुची श्रेष्ठले बिरामीहरूको स्वास्थ्य जाँच तथा परामर्श दिएका थिए ।
कार्यक्रमका प्रमुख अतिथि सांसद शाक्यले यस्ता जनमुखी कार्यक्रमलाई आगामी दिनमा निरन्तरता दिन सहयोग गर्ने प्रतिबद्धता व्यक्त गरे । कार्यक्रम प्रमुख दिलीप राज कार्कीले अस्पतालले केवल व्यवसायिक नभई सेवामुखी भावनाका साथ जनतासँग सहकार्य गर्दै यस्ता कार्यक्रमहरू सञ्चालन गरिरहेको र आगामी दिनमा पनि निरन्तरता दिने बताए ।
ठोरी गाउँपालिकाकी अध्यक्ष गोकुली रेग्मीले दुर्गम क्षेत्रमा यस्ता कार्यक्रमको आवश्यकता औंल्याउँदै गाउँपालिकाले आवश्यक सहयोग र समन्वय गर्ने प्रतिबद्धता जनाइन् ।
त्यसैगरी, वडा नं. १ स्थित वृद्धाश्रममा औषधि सहयोग प्रदान गर्नुका साथै १६ जना ज्येष्ठ नागरिकको स्वास्थ्य परामर्श समेत गरिएको कार्यक्रम प्रमुख कार्कीले जानकारी दिए ।
