धनुषा । राष्ट्रिय दलित नेटवर्क, नेपालको आयोजना तथा सहिदनगर नगरपालिकासँगको समन्वयमा हरवाचरवा समुदायका १५ जना एक्टिभिस्टहरूका लागि दुई दिने पैरालिगल तालिम सम्पन्न भएको छ ।
२०८३ वैशाख १६ र १७ गतेसम्म सहिदनगर नगरपालिका वडा नं. ३ स्थित यदुकाहा बजारमा सञ्चालन भएको उक्त तालिमको उद्घाटन नगरपालिकाकी उप–प्रमुख सुनीता सिंहले गर्नुभएको थियो। तालिममा सहभागीहरूलाई संविधान, मानव अधिकार, श्रम कानुन, नागरिकता तथा भूमि अधिकार, लैङ्गिक हिंसा तथा भेदभावविरुद्धका कानुनी प्रावधानबारे जानकारी दिइनुका साथै मुद्दा दस्तावेजीकरण, कानुनी परामर्श, मेलमिलाप र सन्दर्भ सेवासम्बन्धी व्यवहारिक सीप विकासमा जोड दिइएको थियो।
तालिम समापनसँगै सहभागीहरूले “सहिदनगर घोषणा–पत्र” जारी गर्दै हरवाचरवा समुदायको अधिकार सुनिश्चितता र न्यायमा पहुँच विस्तार गर्ने १० प्रतिबद्धता तथा ५ बुँदे कार्ययोजना सार्वजनिक गरेका छन्।
यसै अवसरमा मन्जु महराको अध्यक्षतामा १३ सदस्यीय “हरवाचरवा पैरालिगल मञ्च” गठन गरिएको छ। मञ्चको उपाध्यक्षमा रविन कुमार सदा, सचिवमा रमेश चमार र कोषाध्यक्षमा सरिता कुमारी पाशवान चयन भएका छन्।
सदस्यहरूमा बुधन महरा, ललित माँझी, श्याम सदा, सन्तोषी सदा, बर्मिलादेवी पाशवान, गुलीदेवी महरा, बनारशी महरा, पवितादेवी सदा र सुनीता कुमारी पाशवान रहेका छन्।
मञ्चले समुदायस्तरमा कानुनी सहायता, परामर्श, उजुरी व्यवस्थापन तथा सरोकारवालासँग समन्वय गर्दै सक्रिय भूमिका निर्वाह गर्ने जनाइएको छ।
घोषणा–पत्रमार्फत नागरिकता तथा जन्मदर्ता जस्ता आधारभूत सेवामा पहुँच, भूमि अधिकार, सुरक्षित आवास, गुणस्तरीय शिक्षा, समान ज्याला, जातीय विभेद अन्त्य, लैङ्गिक हिंसा न्यूनीकरण, बालविवाह रोकथाम, रोजगारी प्रवर्द्धन तथा दाइजो प्रथा र लागुऔषध दुर्व्यसन नियन्त्रणलाई प्राथमिकतामा राखिएको छ।
साथै, मञ्चले ७ बुँदे आचारसंहिता अपनाउँदै पारदर्शिता, जवाफदेहिता, गोपनीयता र नैतिक आचरणमा आधारित सेवा प्रवाह गर्ने प्रतिबद्धता व्यक्त गरेको छ।
तालिममा कानुनी विज्ञ सञ्जु पाण्डे, राष्ट्रिय दलित नेटवर्क, नेपालका कार्यकारी निर्देशक हुकुम बहादुर सार्की तथा सामाजिक परिचालक रामदयाल माँझीले सहजीकरण गर्नुभएको थियो। आयोजकका अनुसार यस कार्यक्रमले हरवाचरवा समुदायको न्यायमा पहुँच सुदृढ गर्दै स्थानीय तहमा दिगो परिवर्तन ल्याउने अपेक्षा गरिएको छ।
