वीरगंज । तलबको माग गर्दै पर्साको छिपहरमाई गाउँपालिकामा कार्यरत कर्मचारीहरूले मंगलबार दोस्रो दिन पनि गाउँपालिका कार्यालयमा धर्ना दिएका छन्।
गाउँपालिका तथा वडा कार्यालयहरूमा कार्यरत करारका कर्मचारीहरूले ७ महिनादेखि तलब नपाएको भन्दै सोमबारदेखि गाउँपालिका कार्यालयमा तालाबन्दी गरी धर्ना सुरु गरेका हुन् । कर्मचारीहरू बिहान ९ बजेदेखि साँझ ५ बजेसम्म भिस्वास्थित गाउँ कार्यपालिकाको कार्यालय अगाडि धर्नामा बस्दै आएका छन्।
धर्नाका कारण गाउँपालिकाको सम्पूर्ण कामकाज ठप्प भएको छ । लामो समयदेखि तलब नपाउँदा दैनिक जीवन सञ्चालनमा गम्भीर समस्या परेको कर्मचारीहरूले बताएका छन् ।
कर्मचारीहरूले तलब निकासाका लागि प्रमुख प्रशासकीय अधिकृत र लेखापालसँग पटक–पटक सम्पर्क गरे पनि कुनै सुनुवाइ नभएको गुनासो गरेका छन् । उनीहरूका अनुसार गाउँपालिका र मातहतका वडा कार्यालयहरूमा कार्यरत करिब ५० जना कर्मचारी ७ महिनादेखि तलबविहीन रहेका छन्।
धर्नाका कारण गाउँपालिका कार्यालयसहित पाँचवटै वडा कार्यालयको सेवा प्रवाह प्रभावित भएको छ । यसले सेवाग्राहीहरू आवश्यक सेवा लिनबाट वञ्चित हुँदै आएका छन् ।
यसैबीच, गाउँपालिकाका प्रमुख प्रशासकीय अधिकृत कादिर बाबु देवानको स्थानमा संजीव कुमार साहको सरुवा भएपनि उनी हालसम्म हाजिर नभएको जनाइएको छ ।
