वीरगंज । ट्राफिक प्रहरी कार्यालय वीरगंजले आइतबार चेकजाँच अभियान सञ्चालन गर्दै १३ वटा ईभी (इलेक्ट्रिक) स्कुटर नियन्त्रणमा लिएको छ । भारतबाट अवैध रूपमा ल्याइएका तथा नम्बर प्लेटबिहीन स्कुटरहरू सडकमा सञ्चालन भइरहेको अवस्थामा फेला परेपछि नियन्त्रणमा लिइएको हो ।
ट्राफिक प्रहरी कार्यालय वीरगंजका वरिष्ठ सई अर्जुन सोडारीका अनुसार नियमित चेकिङका क्रममा बिना नम्बर प्लेट सञ्चालनमा रहेका स्कुटरहरू फेला परेपछि कारबाही स्वरूप नियन्त्रणमा लिइएको हो । उनले अवैध सवारी साधनमाथि निगरानी बढाइएको र चेकजाँच अझ कडा पारिएको जानकारी दिए ।
वरिष्ठ सई सोडारीको नेतृत्वमा खटिएको ट्राफिक प्रहरी टोलीले उक्त स्कुटरहरू नियन्त्रणमा लिएको हो । नियन्त्रणमा लिइएका सबै स्कुटरहरू आवश्यक कारबाहीका लागि वीरगंज भन्सार कार्यालयमा बुझाइने बताइएको छ ।
प्रहरीका अनुसार बिना नम्बर प्लेटका सवारी साधनले दुर्घटना गराएर फरार हुने जोखिम उच्च हुने गर्दछ । साथै, भन्सार प्रक्रिया पूरा नगरी भारतबाट अवैध रूपमा ल्याइएका यस्ता सवारी साधन खुलेआम सडकमा सञ्चालन भइरहेकाले कडाइ गरिएको हो ।
ट्राफिक प्रहरीले यस अघि पनि १३ वटा ईभी (इलेक्ट्रिक) स्कुटर नियन्त्रणमा लिएको थियाे । आगामी दिनमा पनि यस्ता अवैध सवारी साधनविरुद्ध नियमित रूपमा चेकजाँच अभियान जारी राख्ने ट्राफिक प्रहरीले जनाएको छ ।
