वीरगंज । नेपाल चौहान समाज कल्याण समितिको बृहत सम्मेलन पर्साको पोखरियास्थित हनुमान मन्दिरमा सम्पन्न भएको छ । संस्थाका अध्यक्ष विनोद चौहानको अध्यक्षता तथा पोखरिया नगरपालिकाका मेयर प्रधुमन चौहानको प्रमुख आतिथ्यतामा सम्मेलन सम्पन्न भएकाे हो ।
सम्मेलनले नेपालको संविधान २०७२ मा चौहान जातिको पहिचान र अस्तित्व सूचीकृत गराउनका लागि चन्देश चौहानको संयोजकत्वमा ९ सदस्यीय समिति गठन गरेको छ । त्यस्तै, चौहान समाजको क्षमता अभिवृद्धि तथा मानवीय विकास कार्यक्रम सञ्चालनका लागि उमेश चौहानको संयोजकत्वमा ५ सदस्यीय अर्को समिति पनि सर्वसम्मत रूपमा गठन गरिएको छ ।
सम्मेलनमा धोबिनी गाउँपालिकाका अध्यक्ष मदन चौहान लगायतका विशिष्ट व्यक्तिहरू सहित पर्सा जिल्लाभित्रका विभिन्न पालिका तथा वडास्तरका चौहान समाजका पदाधिकारी र सदस्यहरूको उल्लेख्य सहभागिता रहेको आयोजकले जनाएको छ ।
