वीरगंज । पर्साको सखुवा प्रसौनी गाउँपालिका–५ महुवनस्थित पारसनाथ मन्दिरको करिब ६ विघा अतिक्रमित जग्गा आइतबार बिहान खाली गराइएको छ । अतिक्रमण हटाउन ७ वटा डोजर प्रयोग गरिएको थियो ।
मधेश प्रदेशका गृह, सञ्चार तथा कानुन मन्त्री फकिरा महतोको पहलमा उक्त कार्य अघि बढाइएको गाउँपालिका अध्यक्ष जयवन्त यादवले जानकारी दिएका छन् । उनका अनुसार बिहानैदेखि सुरु गरिएको अभियानमा सो क्षेत्रमा निर्माण गरिएका करिब ३८० घरटहरा हटाइएको हो ।
गाउँपालिकाले विगत दुई वर्षदेखि अतिक्रमण हटाउने प्रयास गर्दै आए पनि सफल हुन सकेको थिएन । केही दिनअघि मन्त्री महतोले स्थलगत निरीक्षण गरेपछि योजनाबद्ध रूपमा अतिक्रमण हटाउने प्रक्रिया अघि बढाइएको अध्यक्ष यादवको भनाइ छ ।
अतिक्रमण हटाउने क्रममा सुरक्षा व्यवस्था कडा पारिएको थियो । करिब ३०० जनाको संख्यामा नेपाल प्रहरी र सशस्त्र प्रहरी परिचालन गरिएको वताइएकाे छ । लामो समयदेखि उक्त स्थानमा केही परिवारले घर निर्माण गरी बसोबास गर्दै आएका थिए ।
