वीरगंज । बढ्दो सवारी दुर्घटनालाई न्यूनीकरण गर्ने उद्देश्यले पर्साको पोखरिया बजारमा ट्राफिक सचेतनामूलक कार्यक्रम सञ्चालन गरिएको छ।
ट्राफिक सचेतना कार्यक्रम अन्तर्गत शनिबार इलाका प्रहरी कार्यालय पोखरियाका प्रहरी निरीक्षक प्रदीप पौडेलको पहलमा पोखरिया बजरंग युवा समाजले बजारका विभिन्न स्थानमा ट्राफिक सचेतनामूलक बोर्ड स्थापना गरेको हो।
कार्यक्रम अन्तर्गत “मादक पदार्थ सेवन गरी सवारी नचलाऔं”, “तिव्र गति जीवन क्षति”, “ट्राफिक नियम पालना गरौं” र “हेलमेटको प्रयोग गरौं” जस्ता जनचेतनामूलक सन्देशसहितका बोर्डहरू राखिएको इलाका प्रहरी कार्यालय पोखरियाले जनाएको छ।
प्रहरी निरीक्षक पौडेलले ट्राफिक नियमको पालना र जनचेतना अभिवृद्धि मार्फत दुर्घटना न्यूनीकरण गर्ने उद्देश्यले अभियान सञ्चालन गरिएको बताए।
उक्त कार्यक्रममा प्रहरी निरीक्षक पौडेलसहित पोखरिया बजरंग दलका पवन गुप्ता लगायत स्थानीय युवाहरूको सहभागिता रहेको थियो।
