वीरगंज । लामो समयदेखि अन्योलमा रहेको त्रिभुवन राजपथअन्तर्गत वीरगंजकाे मुख्य सडक विस्तार कार्य अन्ततः आइतबार बिहानदेखि सुरु गरिएको छ। जिल्ला प्रशासन कार्यालय पर्साको अगुवाइमा बिहान सबेरैदेखि सडक सीमाभित्र रहेका अतिक्रमित संरचना हटाउने अभियान थालिएको हो।
प्रशासनले शनिबार साँझ नै सूचना जारी गर्दै आइतबार बिहान साढे ४ बजेसम्म सडकको दायाँ–बायाँ २५/२५ मिटर क्षेत्र खाली गर्न निर्देशन दिएको थियो। सोही निर्देशनअनुसार बिहानैदेखि डोजर र एक्साभेटर प्रयोग गरी घर, टहरा तथा अन्य संरचनाहरू हटाउन सुरु गरिएको हो।
पर्साका प्रमुख जिल्ला अधिकारी भोलाप्रसाद दाहालका अनुसार नेपाल–भारत मितेरी पुलदेखि गण्डक चोकसम्मको क्षेत्रमा सडकको केन्द्रबिन्दुबाट दुवैतर्फ २५ मिटरभित्र पर्ने सम्पूर्ण संरचना हटाइँदैछ। सडक विस्तारलाई तीव्रता दिन भन्सार क्षेत्र, घण्टाघर, मुर्ली तथा चिनी मिल आसपासका विभिन्न स्थानमा एकैसाथ काम अघि बढाइएको छ।
सडक डिभिजन कार्यालय हेटौँडाका अनुसार विस्तार कार्यलाई प्रभावकारी बनाउन पाँच स्थानबाट एकैपटक काम सुरु गरिएको छ भने डोजर, एक्साभेटरसहित करिब एक दर्जन उपकरण परिचालनमा छन्। सुरक्षाको दृष्टिले ठूलो संख्यामा प्रहरी परिचालन गरिएको छ।
वीरगंज महानगरपालिका, सडक डिभिजन कार्यालय, स्थानीय प्रशासन तथा सुरक्षानिकायबीचको समन्वयमा अतिक्रमण हटाउने काम भइरहेको छ। प्रशासनले चरणबद्ध रूपमा संरचना हटाउँदै सडक विस्तारलाई अगाडि बढाउने जनाएको छ।
यसअघि करिब १३ वर्षदेखि अवरुद्ध रहेको यो योजना सर्वोच्च अदालतको फैसलापछि कार्यान्वयनमा आएको हो। २०८१ फागुन २८ गते सर्वोच्च अदालतले सडक विस्तारसम्बन्धी मुद्दामा सरकारकै पक्षमा फैसला गर्दै जग्गाधनीहरूले दायर गरेको रिट खारेज गरेपछि विस्तारको बाटो खुलेको हो।
रिट निवेदकहरूले मुआब्जा तथा वैकल्पिक व्यवस्थाको माग गर्दै मुद्दा दायर गरेका थिए। साथै, जग्गा प्राप्ति ऐन, २०३४ र सार्वजनिक सडक ऐन, २०३१ अनुसार प्रक्रिया नअपनाइएको दाबी गरेका थिए। तर अदालतले उक्त दाबी अस्वीकार गरेपछि प्रशासनले रोकिएको योजना कार्यान्वयनमा ल्याएको हो।
अब अतिक्रमण हटाउने कार्यसँगै वीरगंजकाे मुख्य सडकलाई व्यवस्थित, फराकिलो र सुरक्षित बनाउने लक्ष्यका साथ विस्तार अभियान अघि बढाइएको छ।
