वीरगंज । जेन जी पर्साले सीमावर्ती भन्सार नाकामा १०० रुपैयाँभन्दा बढी मूल्यका सामान ल्याउँदा भन्सार गराएर मात्र ल्याउने नियम लागु नगर्न माग गर्दै पर्साका प्रमुख जिल्ला अधिकारी भोला दाहाललाई ध्यानाकर्षण पत्र बुझाएको छ।
जिल्ला प्रशासन कार्यालय पर्सामा बुझाइएको उक्त पत्रमा नेपाल–भारतबीचको पुरानो सामाजिक, सांस्कृतिक तथा पारिवारिक सम्बन्धलाई स्मरण गर्दै हाल भन्सार कार्यालयहरूले अपनाएको कडाइले सीमावर्ती क्षेत्रका आम नागरिकको दैनिकीमा गम्भीर असर परेको उल्लेख गरिएको छ।
पत्रमा विशेषगरी वीरगंजलाई देशको प्रमुख प्रवेशद्वार तथा सबैभन्दा बढी राजस्व संकलन हुने भन्सार क्षेत्रका रूपमा चिनिए पनि यहाँका नागरिकले अपेक्षित सुविधा नपाएको गुनासो गरिएको छ। साथै, दैनिक उपभोग्य सामग्री समेत १०० रुपैयाँभन्दा बढी भएमा भन्सार तिर्नुपर्ने बाध्यकारी व्यवस्थाले सर्वसाधारण मारमा परेको जनाइएको छ।
जेन जी पर्साले राज्यले तस्करी नियन्त्रण गर्नुपर्ने दायित्वलाई स्वीकार गर्दै त्यसको नाममा सर्वसाधारण नागरिकलाई दुःख दिन नहुने स्पष्ट पारेको छ। खुला सीमाको विशेषताका कारण सीमावर्ती बासिन्दाले घरायसी प्रयोजनका लागि सामान ल्याउँदा सहज वातावरण हुनुपर्ने उनीहरूको माग छ।
पत्रमा भन्सार छलि हुने तस्करीका घटनाहरू नियन्त्रण गर्न प्रभावकारी कदम चाल्नु पर्नेमा जोड दिँदै आम नागरिकलाई अनावश्यक झन्झटमा पार्ने नीति तत्काल खारेज गर्न आग्रह गरिएको छ।
साथै, उक्त मागप्रति सम्बन्धित निकायले चाँडो सम्बोधन नगरे जेन जी पर्साले चरणबद्ध आन्दोलनका कार्यक्रम अघि बढाउने र आवश्यक परे नाका बन्द गर्न समेत बाध्य हुने चेतावनी दिएको छ।
उक्त ध्यानाकर्षण पत्रको बोधार्थ प्रधानमन्त्रीको कार्यालय, अर्थ मन्त्रालय तथा गृह मन्त्रालयमा समेत पठाइएको जेन जी पर्साका संयोजक महादेव कुर्मीले जानकारी दिएका छन्।
