वीरगंज । पर्सागढी नगरपालिका वडा नं. ५ स्थित हरदिया गाउँमा आँखा, दन्त तथा मेडिसिन सम्बन्धी रोगहरूको बृहत स्वास्थ्य स्क्रिनिङ शिविर सम्पन्न भएको छ। बिहीबार आयोजित उक्त कार्यक्रममा स्थानीय बासिन्दाहरूको उल्लेखनीय सहभागिता रहेको थियो।
शिविरमा विशेषगरी आँखासम्बन्धी मोतियाबिन्दु, बालबालिकामा दाँतमा किरा लाग्ने समस्या, उच्च रक्तचाप (प्रेशर) तथा मधुमेह (शुगर) जस्ता रोगहरूको परीक्षण गरिएको थियो। साथै, सम्भावित जोखिममा रहेका व्यक्तिहरूको पहिचान गरी समयमै उपचारतर्फ अभिमुख गराउने उद्देश्य राखिएको आयोजकले जनाएको छ।
कार्यक्रमका क्रममा डा. चन्द्र भूषण सिंहले गाउँ समाजमा मोतियाबिन्दु, दन्त समस्या, उच्च रक्तचाप तथा मधुमेह जस्ता रोगहरू देखा परे पनि आर्थिक अभावका कारण नियमित औषधि सेवन नगर्ने समस्या अझै विद्यमान रहेको बताउनुभयो।
त्यस्तै, चिकित्सक जीतेन्द्र गिरीले आँखा तथा दाँतसम्बन्धी समस्या ग्रामीण क्षेत्रमा बेवास्ता गरिने प्रमुख स्वास्थ्य समस्या रहेको उल्लेख गर्दै शल्यक्रिया आवश्यक भएका बिरामीहरूको व्यवस्थापन वीरगंजस्थित आँखा अस्पतालमा गरिने जानकारी दिनुभयो।
शिविरमा आँखा तथा दन्त सेवा अन्तर्गत ३३ जना र मेडिकल सेवा अन्तर्गत करिब ४२ जना गरी ७५ जनाभन्दा बढी सेवाग्राहीले सेवा लिएका थिए। कार्यक्रमबारे जानकारी “समानता अभियान नेपाल” का अभियन्ता इन्जिनियर गोल कुमार बस्नेटले दिनुभएको हो।
कार्यक्रममा स्थानीय समाजसेवी, अगुवा तथा सर्वसाधारणको सक्रिय उपस्थिति रहेको थियो। गाउँ समाजमा देखिने सामान्य तर गम्भीर बन्न सक्ने रोगहरूको समयमै पहिचान, परामर्श तथा उपचारमार्फत जनचेतना अभिवृद्धि गर्ने उद्देश्यका साथ शिविर आयोजना गरिएको हो।
