वीरगंज । पाँचौं परवानीपुर गोल्डकप फुटबल प्रतियोगितालाई लक्षित गर्दै आइतबार बिहान खेल मैदान सरसफाइ गरिएको छ । आगामी वैशाख ५ देखि १२ गतेसम्म सञ्चालन हुने प्रतियोगिताको तयारीस्वरूप आयोजक क्लबका पदाधिकारी, सदस्य तथा खेलाडीहरू सक्रिय रूपमा मैदान सरसफाइमा जुटेका हुन् ।
शक्ति युवा क्लब परवानीपुरको आयोजनामा हुने उक्त प्रतियोगितामा आठ वटा टिमको सहभागिता रहने प्रतियोगिताका संयोजक संजय मण्डलले जानकारी दिए ।
उनका अनुसार प्रतियोगितामा आयोजक शक्ति युवा क्लबसँगै वीरगंज युनाइटेड क्लब, वीरगंज युथ क्लब, रिगल हेटौडा एन्फा क्लब, बारा, रौतहट, सर्लाही, चितवन र एपीएफ बर्दिवासका टिमहरू सहभागी हुनेछन् ।
‘राष्ट्रको लागि खेलकूद, स्वास्थ्यको लागि खेलकूद’ भन्ने नारासहित सञ्चालन हुने परवानीपुर गोल्डकप–२०८३ वैशाख ५ देखि १२ गतेसम्म परवानीपुर खेल मैदानमा दैनिक अपराह्न ३ बजेदेखि ५ बजेसम्म हुने सह–संयोजक दिपक यादवले बताए ।
प्रतियोगितामा प्रथम हुने टिमलाई २ लाख रुपैयाँ र द्वितीय हुने टिमलाई १ लाख रुपैयाँ नगद पुरस्कार प्रदान गरिनेछ । साथै उत्कृष्ट डिफेन्डर, फरवार्ड तथा प्रत्येक खेलका उत्कृष्ट खेलाडीलाई समेत नगदसहित पुरस्कृत गरिने आयोजक क्लबका अध्यक्ष सुबोध श्रीवास्तवले जानकारी दिए । प्रतियोगिताभरका उत्कृष्ट खेलाडीलाई ५१०० रुपैयाँ नगद पुरस्कार प्रदान गरिनेछ ।
प्रतियोगिता सभ्य र भव्य रूपमा सम्पन्न गर्न आयोजकले पर्सा–बाराका जनप्रतिनिधि, सुरक्षा निकाय, उद्योगी–व्यवसायी, खेलप्रेमी तथा सञ्चारकर्मीहरूलाई सहयोगका लागि आग्रह गरेको छ ।
सरसफाइ कार्यक्रममा क्लबका पूर्वअध्यक्ष राजमहम्द मियाँ, उपाध्यक्ष हुलास यादव, महासचिव ध्रुव साह, कोषाध्यक्ष सोनालाल मण्डल, प्रशिक्षक पंकज चौधरी, पूर्व फुटबल खेलाडी बिनोद न्यौपाने तथा सदस्यहरू तिवारी यादव, राजेश यादव, दिपेश यादवलगायतको सहभागिता रहेको थियो ।
