वीरगंज । पर्साको जिराभवानी गाउँपालिका वडा नं. १ बलुवामा आगलागीबाट घर गुमाएका एक पीडित परिवारलाई खाद्यान्न सहयोग प्रदान गरिएको छ भने घर निर्माण गरिदिने प्रतिबद्धता पनि गरिएको छ।
स्थानीय मोटर मुखियाको घर गत बिहीबार राति करिब ११ः३० बजे लामखुट्टे भगाउन बालिएको मच्छरधुपबाट सल्किएको आगोका कारण पूर्ण रूपमा जलेर नष्ट भएको थियो।
आगलागी पीडित परिवारको अवस्थाबारे जानकारी पाएपछि राष्ट्रिय स्वतन्त्र पार्टी (रास्वपा) का युवा नेता तथा जगरनाथपुर गाउँपालिका–२, जानकीटोल निवासी सन्तोष कुमार आफैं घटनास्थल पुगेर राहत सामग्री वितरण गरेका हुन् । उनले २ बोरा चामल, १ बोरा आलु, १ प्याकेट प्याज र १ बोरा चिउरा लगायतका खाद्यान्न सामग्री सहयोग गरेका छन्।
यससँगै उनले आफ्नै लगानीमा पीडित परिवारका लागि झोपडी घर निर्माण गरिदिने प्रतिबद्धता समेत जनाएका छन्।
आगलागीबाट घरमा रहेका सम्पूर्ण सामग्री जलेर नष्ट भएका छन् । केही दिनअघि मात्र लघुवित्त विकास बैंकबाट घर निर्माणका लागि लिइएको करिब ६ लाख रुपैयाँ पनि आगोमा जलेर नष्ट भएको पीडितले बताएका छन् । साथै आगलागीका कारण चार वटा बाख्रा र एक गाईको समेत मृत्यु भएको छ।
हाल पीडित परिवार अत्यन्त कठिन अवस्थामा रहेको छ र थप सहयोगको खाँचो रहेको स्थानीयहरूले बताएका छन्। उनीहरूलाई सकेसम्म सहयोग गर्न सर्वसाधारणसँग अपिल समेत गरिएको छ।
