काठमाडौँ । प्रतिनिधिसभाको उपसभामुख पदमा श्रम संस्कृति पार्टीकी रुबीकुमारी ठाकुर निर्वाचित हुनुभएको छ।
आज बसेको प्रतिनिधिसभाको बैठकमा प्रस्तावक र समर्थकहरूको छलफलपछि भएको मतदानमा ठाकुरले अत्यधिक मत प्राप्त गर्दै विजय हासिल गर्नुभएको हो। सभामुख डोलप्रसाद अर्यालले उहाँको निर्वाचन भएको घोषणा गर्नुभयो।
मतदानमा ठाकुरको पक्षमा २२९ मत खसेको थियो भने प्रतिस्पर्धी राष्ट्रिय प्रजातन्त्र पार्टी (राप्रपा) की सरस्वती लामाले ५ मत मात्र प्राप्त गर्नुभयो। ‘कसैलाई मत नदिने’ विकल्पमा २२ मत खसेको थियो।
हाल प्रतिनिधिसभामा २७५ सदस्य रहेकामा २५६ जना सांसद मतदानमा सहभागी भएका थिए।
निर्वाचित भएपछि सभामुख अर्यालले ठाकुरलाई बधाई दिनुभएको थियो। २६ वर्षीया ठाकुरलाई राष्ट्रिय स्वतन्त्र पार्टी (रास्वपा), नेपाली कांग्रेस, नेपाल कम्युनिष्ट पार्टी (एमाले) र नेकपाको समर्थन प्राप्त भएको थियो।
यसैबीच, प्रतिनिधिसभाको पहिलो अधिवेशन शुक्रबार राति १२ बजेदेखि समाप्त हुने जनाइएको छ।
