वीरगंज । नेपाल फोटो पत्रकार महासंघ, पर्सा कार्यसमितिले केन्द्रीय सदस्यमा निर्वाचित भएका राहुल गुप्तालाई एक कार्यक्रमका बीच सम्मान गरेको छ।
गत फागुन २० र २१ गते चितवनमा सम्पन्न नेपाल फोटो पत्रकार महासंघको तेस्रो महाधिवेशनमा पर्साबाट केन्द्रीय सदस्यमा निर्वाचित गुप्तालाई जिल्ला समितिले शुक्रबार बधाई तथा शुभकामना दिँदै सम्मान गरेको हो।
फोटो पत्रकार महासंघ पर्साका अध्यक्ष सफल खतिवडाको अध्यक्षतामा आयोजित कार्यक्रममा जिल्ला कार्यसमितिका कोषाध्यक्ष शम्भु कुमार सुमन, पूर्व सचिव एवं नेपाल पत्रकार महासंघ पर्साका कार्यसमिति सदस्य तिवारी यादव, जिल्ला कार्यसमिति सदस्य आरोहण साहलगायतले गुप्तालाई खादा ओढाएर सम्मान गरेका थिए।
कार्यक्रममा उपस्थित पदाधिकारी तथा सदस्यहरूले गुप्तालाई बधाई तथा शुभकामना व्यक्त गर्दै उनको कार्यकाल सफल रहोस् भन्ने कामना गरेका थिए।
नवनिर्वाचित केन्द्रीय सदस्य राहुल गुप्ताले आफूलाई गरिएको सम्मानप्रति आभार व्यक्त गर्दै फोटो पत्रकारहरूको पेशागत हकहित, क्षमता अभिवृद्धि तथा संस्थागत सुदृढीकरणका लागि सक्रियतापूर्वक लागिरहने प्रतिबद्धता जनाए।
