वीरगंज । सरकारी सञ्चारमाध्यममा मात्र सरकारी सूचना प्रकाशन तथा प्रसारण गर्ने प्रधानमन्त्री तथा मन्त्रिपरिषद्को कार्यालयको परिपत्रको विरोधमा नेपाल पत्रकार महासंघ पर्सा शाखाले बिहीबार जिल्लाका पत्रकारहरूसँग छलफल गरेको छ।
सरकारले संघीय मन्त्रालय, आयोग, सचिवालय, प्रदेश तथा स्थानीय तहलाई सरकारी सञ्चारमाध्यममा मात्र सूचना प्रकाशन गर्न निर्देशन दिएको परिपत्रको विरोध गर्दै उक्त निर्णय तत्काल फिर्ता गराउन दबाब सिर्जना गर्ने उद्देश्यले छलफल आयोजना गरिएको हो । कार्यक्रममा पर्सा जिल्लाबाट प्रकाशित तथा प्रसारित दैनिक, साप्ताहिक र अनलाइन सञ्चारमाध्यमका प्रकाशक तथा सम्पादकहरूको सहभागिता रहेको थियो।
नेपाल पत्रकार महासंघ पर्साको सभाहलमा आयोजित कार्यक्रममा सहभागीहरूले सरकारको उक्त निर्णयले निजी सञ्चारमाध्यम र त्यहाँ कार्यरत पत्रकारहरू अन्यायमा परेको बताएका छन्। उनीहरूले सरकारी विज्ञापनलाई व्यवस्थित र नियमन गर्नुपर्नेमा उल्टै निजी सञ्चारमाध्यमलाई नै वञ्चित गर्ने प्रयास भएको भन्दै आपत्ति जनाए।
वक्ताहरूले यस्तो निर्णय कार्यान्वयन भए धेरै निजी सञ्चारमाध्यम बन्द हुने अवस्था आउन सक्ने र ठूलो संख्यामा पत्रकारहरूको रोजगारी समेत गुम्न सक्ने चेतावनी दिएका छन्। त्यसैले सरकारले उक्त निर्णय तत्काल फिर्ता लिनुपर्ने माग उनीहरूको रहेको छ।
सरकारले आफ्नो निर्णयबाट पछि नहटे पत्रकार महासंघको नेतृत्वमा आन्दोलनमा उत्रनुपर्ने धारणा समेत कार्यक्रममा व्यक्त गरिएको थियो।
नेपाल पत्रकार महासंघ पर्साका अध्यक्ष ओमप्रकाश खनालको अध्यक्षतामा सम्पन्न कार्यक्रममा महासंघ मधेश प्रदेशका सचिव दिपक गौतम, प्रेस चौतारीका केन्द्रीय सदस्य विजय भण्डारी, प्रेस सेन्टर मधेश प्रदेशका अध्यक्ष निरज पिठाकोटे मगर, समाजवादी प्रेस संगठन मधेश प्रदेशका अध्यक्ष मनोज पटेल, पर्सा जिल्ला अध्यक्ष शम्भु कुमार सुमन लगायतको उपस्थिति रहेको थियो। कार्यक्रमको सञ्चालन महासंघ पर्साका सचिव विजय चौहानले गरेका थिए।
