रक्सौल (बिहार) । भारत–नेपाल सीमा क्षेत्रमा कार्यरत रहँदा इन्स्पेक्टर मनोज कुमार शर्माले गरेको एक मानवीय कार्यले दुई वर्षपछि एक बिछोडिएको परिवारलाई पुनः मिलाएको छ ।
जुलाई २०२४ मा असम सरुवा भईसके पनि शर्माले ०१ मे २०२४ मा रक्सौलस्थित हाजमा टोल नजिक रेल्वे लाइन छेउबाट मानसिक रूपमा अस्वस्थ र बेसहारा अवस्थामा भेटिएकी एक वृद्ध महिलाको उद्धार गरेका थिए । राति करिब ११:३५ बजे गस्तीका क्रममा उनले झाडीमा लुकेर बसेकी ती महिलालाई देखेपछि तत्काल उद्धार अभियान सुरु गरेका थिए ।
सशस्त्र सीमा बल (एसएसबी) को मानव तस्करी विरोधी इकाइका इन्चार्जसमेत रहेका शर्माले टोलीलाई बोलाई महिलालाई सुरक्षित रूपमा उद्धार गरी ‘माहेर ममता निवास’ रक्सौलमा आश्रय दिलाएका थिए । त्यसपछि उनको उपचार डंकन अस्पतालमा निरन्तर गराइएको थियो ।
लामो समयको उपचार र हेरचाहपछि महिलाको स्वास्थ्यमा सुधार आएको र बिस्तारै स्मरणशक्ति पनि फर्किएको थियो । त्यसपछि उनले आफ्नो घर क्षेत्र र नजिकको प्रहरी थानाबारे जानकारी दिएपछि सम्बन्धित निकायमार्फत परिवारसँग सम्पर्क स्थापित गरिएको थियो ।
परिवारका अनुसार उनीहरूको आमा अप्रिल २०२४ मा खेतबाट फर्कने क्रममा हराएकी थिइन् । लामो खोजीपछि पनि कुनै पत्ता नलाग्दा परिवार निराश बनेको थियो ।
०५ अप्रिल २०२६ मा हरैया थाना प्रमुख किशन पासवानको उपस्थितिमा ती महिलालाई उनका दाजु जयपाल गोंडलाई औपचारिक रूपमा जिम्मा लगाइएको थियो । त्यसपछि उनी मध्यप्रदेशको अनूपपुर जिल्लास्थित आफ्नै गाउँ फर्किएकी छन् ।
करिब दुई वर्षपछि आमालाई सकुशल भेट्दा परिवारका सदस्य भावुक बनेका थिए । उनीहरूले उद्धारमा संलग्न सम्पूर्ण टोलीप्रति आभार व्यक्त गरेका छन् ।
उक्त मानवीय कार्यमा इन्स्पेक्टर मनोज कुमार शर्मा, उपनिरीक्षक अनिल कुमार शर्मा, कन्स्टेबलहरू जितेन्द्र, टिनु कुमारी, पिंकी कुमारी तथा माहेर ममता निवासका बीरेन्द्र कुमारसहितको टोलीको महत्वपूर्ण भूमिका रहेको थियो ।
यो घटना केवल उद्धार अभियान मात्र नभई कर्तव्यनिष्ठा, संवेदनशीलता र मानवताको उत्कृष्ट उदाहरणका रूपमा प्रस्तुत भएको छ ।
