वीरगंज । दृष्टि सम्बन्धी अपाङ्गता भएका खेलाडीहरूको क्षमता विकास गर्ने उद्देश्यले मधेश प्रदेश नेत्रहीन क्रिकेट संघले पाँच दिने क्रिकेट प्रशिक्षण कार्यक्रम सुरु गरेको छ। कार्यक्रम राउन्ड टेबल नेपालको सहयोगमा वीरगञ्ज महानगरपालिका–५ स्थित मुनलाइट स्कुलमा शुक्रबारदेखि सुरु भएको हो।
पर्वत, तनहुँ, चितवन, गोरखा, पर्सा लगायत देशका १२ जिल्लाबाट आएका २० जना दृष्टिविहीन खेलाडी प्रशिक्षणमा सहभागी छन्। कार्यक्रम आइज नेपाल पर्साकी कोषाध्यक्ष रुपशिला जैसवालको अध्यक्षतामा तथा राउन्ड टेबल नेपाल BFRT 8 का अध्यक्ष दीपक कुमार अग्रवालको प्रमुख आतिथ्यमा सञ्चालन भएको हो।
कार्यक्रममा बोल्दै अग्रवालले राउन्ड टेबल नेपालले सधैं विपन्न र असहाय वर्गको सेवा गर्दै आएको उल्लेख गर्दै दृष्टिविहीन खेलाडीहरूको प्रतिभा विकासमा सानो योगदान गर्न पाएकोमा गर्व व्यक्त गरे। उनले मेहनत र लगनशीलताले सफलता निश्चित हुने विश्वास पनि व्यक्त गरे।
कार्यक्रममा कञ्चनजंघा स्कुलका निर्देशक मार्टिन मोक्तान, बीरगञ्ज कपडा बैंकका अध्यक्ष लालबाबु सिंह, जनमत पार्टी पर्साका अध्यक्ष ओमप्रकाश सराफ, राउन्ड टेबलका मोहित राजपाल लगायतको उपस्थिति रहेको थियो। अन्तर्राष्ट्रिय खेलाडी मनकेशी चौधरीले अतिथिहरूलाई खादा लगाएर स्वागत गरेकी थिइन्। स्वागत मन्तव्य आइज नेपाल पर्साका सचिव उदित कुमार साहले राखे भने कार्यक्रम सञ्चालन मधेश प्रदेश नेत्रहीन क्रिकेट संघका अध्यक्ष तथा आइज नेपाल अध्यक्ष महेश साहले गरेका थिए।
