वीरगंज । विशेष साहको नेतृत्वमा जेन जेड युथ फोर्स पर्साको बैठक मंगलबार वीरगंजमा सम्पन्न भएको छ। बैठकमा पर्सा जिल्लाका विभिन्न वडा तथा स्थानीय तहबाट सयौं युवाहरूको उल्लेखनीय सहभागिता रहेको थियो।
बैठकमा संगठनलाई थप सशक्त बनाउने, युवा नेतृत्व विकासलाई प्राथमिकता दिने तथा युवाहरूको सहभागिता विस्तार गर्ने विषयमा व्यापक छलफल गरिएको थियो । सहभागीहरूले संगठनलाई टोलदेखि जिल्ला तहसम्म मजबुत बनाउने रणनीतिमा जोड दिएका छन्।
छलफलका क्रममा छिट्टै टोल, वडा, पालिका, महानगर तथा जिल्ला स्तरमा समिति गठन गर्ने निर्णय गरिएको छ । साथै, संगठनमा थप युवाहरूलाई आबद्ध गर्ने, भ्रष्टाचारविरुद्ध सक्रिय अभियान सञ्चालन गर्ने तथा विभिन्न सामाजिक कार्यहरू अगाडि बढाउने योजना समेत तय गरिएको छ।
कार्यक्रममा सहभागी युवाहरूले समाजमा सकारात्मक परिवर्तन ल्याउन एकजुट भएर अघि बढ्ने प्रतिबद्धता व्यक्त गरेका छन्। आयोजक पक्षले आगामी दिनहरूमा संगठनलाई अझ प्रभावकारी र सशक्त बनाउँदै लैजाने विश्वास व्यक्त गरेको छ।
