काठमाडौँ । जिल्ला अदालत काठमाडौँले नेकपा (एमाले) का अध्यक्ष केपी शर्मा ओली र नेपाली कांग्रेसका नेता रमेश लेखक लाई पाँच दिन हिरासतमा राखेर अनुसन्धान गर्न अनुमति दिएको छ।
न्यायाधीश आनन्दप्रसाद श्रेष्ठ को इजलासले आज उक्त म्याद थपको अनुमति दिएको अदालतका स्रेस्तेदार तीर्थराज भट्टराई ले जानकारी दिएका छन्।
अदालतको आदेशमा प्रतिवादीहरूको बयान लिन, बुझ्नुपर्ने व्यक्तिहरूसँग सोधपुछ गर्न तथा मिति २०८२/०५/२३ र २४ गतेको घटनासम्बन्धी जाँचबुझ आयोग, २०८२ को प्रतिवेदन अध्ययन–विश्लेषण गर्न आवश्यक देखिएकाले प्रहरी हिरासतमा राख्न अनुमति दिइएको उल्लेख गरिएको छ। सोही आधारमा मुलुकी फौजदारी कार्यविधि संहिता, २०७४ को दफा १४ (६) बमोजिम पाँच दिनको म्याद थप गरिएको हो।
यसअघि सरकारी वकिलले दुवै नेतालाई १० दिन हिरासतमा राख्न माग गरेको थियो।
अदालतले अध्यक्ष ओली अस्वस्थ भई उपचाररत रहेको उल्लेख गर्दै आवश्यक र प्रभावकारी उपचारको व्यवस्था गर्न पनि आदेश दिएको छ। हाल उनी त्रिवि शिक्षण अस्पतालमार्फत ‘भर्चुअल’ रूपमा उपस्थित भएका थिए भने नेता लेखक स्वयं अदालतमा उपस्थित भएका थिए।
गत भदौ २३ र २४ गते भएको ‘जेनजी आन्दोलन’ का बेला ओली प्रधानमन्त्री तथा लेखक गृहमन्त्री थिए। सो आन्दोलनका क्रममा भएको दमनबारे जाँचबुझ गर्न गठित आयोगले दुवै नेताविरुद्ध फौजदारी मुद्दा अघि बढाउन सिफारिस गरेको थियो। सोही सिफारिसका आधारमा शनिबार बिहान पक्राउ गरिएको हो।
