वीरगंज । हरि खेतान बहुमुखी क्याम्पसमा उत्पन्न समस्या समाधानका लागि आइतबार जिल्ला प्रशासन कार्यालय, पर्सामा क्याम्पस व्यवस्थापन समिति, प्रध्यापक र विद्यार्थीबीच बैठक बसेको छ।
बैठकमा क्याम्पस प्रशासनले आइतबार स्थगित गरिएको परीक्षा र पठन–पाठन तत्काल सञ्चालन गर्ने सहमति जुटाएको छ। आन्दोलनका क्रममा घाइते भएका विद्यार्थीहरुको उपचारको व्यवस्था क्याम्पस प्रशासनले मिलाउने जिम्मेवारी लिएको पनि निर्णयमा उल्लेख छ।
विद्यार्थीका अन्य माग र समस्याहरुको समाधानका लागि सोमबार पुनः बैठक आयोजना गरिने निर्णय भएको छ। सो बैठकमा क्याम्पस व्यवस्थापन समिति, प्रशासन र विद्यार्थी सहभागी हुनेछन्।
दिनभर चलेको प्रदर्शनपछि साँझ प्रमुख जिल्ला अधिकारी भोला दाहालको रोहबरमा क्याम्पस व्यवस्थापन, शिक्षक प्रतिनिधि र विद्यार्थी अगुवाहरूसँग बैठक बसेको थियो।
