रहबरले प्रचण्डलाई भने: “भोट होइन, नेताको चरित्र जाँच्नुस्”

बारा । बारा निर्वाचन क्षेत्र नम्बर ४ बाट निर्वाचित राष्ट्रिय स्वतन्त्र पार्टी (रास्वपा) का सङ्घीय सांसद रहबर अन्सारी ले पुष्पकमल दाहाल ‘प्रचण्ड’ लाई भोटभन्दा चरित्र जाँच्न सुझाव दिएका छन्।

नेपाल कम्युनिस्ट पार्टी (नेकपा) का संयोजक दाहालले घण्टीमा मतदान गर्ने केन्द्रीय सदस्यदेखि कार्यकर्तासम्मलाई कारबाही गर्ने चेतावनी दिएपछि सांसद अन्सारीले त्यसप्रति प्रतिक्रिया जनाएका हुन्। उनले गोप्य मतदान लोकतन्त्रको आत्मा भएकाले यसप्रति शंका नभई सम्मान गर्नुपर्ने बताएका छन्।

सामाजिक सञ्जाल फेसबुकमार्फत अन्सारीले लेखेका छन्, “साँच्चै सुधार गर्न चाहनुहुन्छ भने आम्दानी बिना विलासी जीवन बाँच्ने नेताहरू, व्यवसायीलाई धम्की दिएर चन्दा असुल्ने सङ्गठित सदस्यहरूलाई कारबाही गर्नुस्।”

उनले थप्दै फाइल ठेक्का लिएर सिंहदरबार धाउने दलालहरू, सरकारी कर्मचारीसँग तेलको कुपन माग्नेहरू तथा कमिसनमा योजना बेच्ने प्रतिनिधिहरूमाथि कडा कारबाही गर्नुपर्ने बताएका छन्।

अन्सारी यसअघि तत्कालीन माओवादी केन्द्रमा अध्यक्ष प्रचण्डका विश्वासपात्र मानिन्थे। २०७९ को निर्वाचनमा उनी माओवादी केन्द्रबाट पर्सा क्षेत्र नं. १ (क) बाट प्रदेशसभा सदस्यमा निर्वाचित भएका थिए।