वीरगंज । राष्ट्रिय दलित आयोगका सदस्य सुन्दर पुर्कुटीले दलित समुदायसँग सम्बन्धित घटनामा संवेदनशील भई प्राथमिकताका साथ काम गर्न प्रशासनलाई आग्रह गरेका छन्।
सोमबार बिहान जिल्ला प्रशासन कार्यालय पर्सामा प्रमुख जिल्ला अधिकारी भोला दाहाल, पर्साका प्रमुख प्रहरी उपरीक्षक सुदिपराज पाठक लगायतसँगको छलफलका क्रममा उनले दलित समुदायका मुद्दालाई गम्भीरतापूर्वक लिनुपर्ने बताए।
पर्साको सखुवाप्रसौनी गाउँपालिका वडा नं. ५ महुवनमा भएको कुटपिटको घटनाबारे सत्यतथ्य पत्ता लगाई पीडितलाई न्याय दिलाउन उनले प्रशासनसँग माग गरे। नेपालको संविधानमै दलित समुदायको अधिकार सुनिश्चित गरिएको उल्लेख गर्दै ती व्यवस्थाहरू प्रभावकारी रूपमा कार्यान्वयन भए कसैले पनि न्यायका लागि भौतारिनु नपर्ने उनको भनाइ थियो।
पुर्कुटीले जातीय विभेदसँग जोडिएका घटनामा कुनै पनि किसिमको सम्झौता नगर्ने स्पष्ट पार्दै दोषीलाई कानुनबमोजिम कारबाही हुनुपर्ने बताए। उनले भने, “जातीय विभेदजन्य घटना भएमा जसरी पनि दोषीलाई कानुनअनुसार कारबाही हुनुपर्छ। यसमा राजनीतिक हस्तक्षेप वा कुनै पनि किसिमको दबाब र प्रभाव सह्य हुँदैन।”
पर्साका प्रमुख जिल्ला अधिकारी भोला दाहालले कानुनले कसैलाई पनि काखा र पाखा नगर्ने बताए। दलित समुदायका सवालमा प्रहरी र प्रशासन सधैँ सकारात्मक रहेको उल्लेख गर्दै उनले सबै सेवाग्राहीलाई समान रूपमा सेवा प्रदान गर्ने प्रतिबद्धता व्यक्त गरे।
त्यस्तै पर्साका प्रमुख प्रहरी उपरीक्षक सुदिपराज पाठकले दलितका विषयलाई संवेदनशील ढंगले अध्ययन तथा अनुसन्धान गरिरहेको बताए। उनका अनुसार कहिलेकाहीँ राजनीतिक स्वार्थका लागि घटनालाई जातीय विषयसँग जोड्ने प्रवृत्ति देखिने गरेको भन्दै यसप्रति सचेत रहनुपर्ने आवश्यकता रहेको बताए।
महुवन घटनाबारे प्रहरीले उजुरी दर्ता गर्नुका साथै घाउ जाँच (केस फारम) समेत गरिसकेको जानकारी दिँदै उनले छिट्टै अनुसन्धान पूरा गरी दोषीलाई कारबाही र पीडितलाई न्याय दिलाइने बताए।
सो अवसरमा पर्साका सहायक प्रमुख जिल्ला अधिकारी विनोद कुमार पोखरेल, दलित अगुवा अशोक राउत, मानदेव हजरा, लबकुश बैठा, दलित अभियन्ता मनोज राम, सुरेन्द्र पासवान, उर्मिला महतो लगायतको उपस्थिति रहेको थियो।
यसअघि आयोगको टोलीले सखुवाप्रसौनी गाउँपालिका वडा नं. ५ महुवन पुगेर घटनामा घाइते भएकाहरूसँग भेटघाट गरी घटनाबारे जानकारी लिएको थियो।
