वीरगंज । नेशनल मेडिकल कलेज तथा शिक्षण अस्पताल, वीरगंजले पर्सा र बारा जिल्लाका विभिन्न मदरसा तथा यतीमखानामा अध्ययनरत बालबालिकाहरूका लागि सामाजिक उत्तरदायित्वअन्तर्गत कपडा वितरण कार्यक्रम आयोजना गरेको छ।
कलेजले यस कार्यक्रमअन्तर्गत ५१४ जना बालबालिका, ९३ जना शिक्षक र ५ जना महिला कर्मचारी गरी कुल ६१२ जनालाई कपडा वितरण गरेको जनाएको छ। वितरण कार्यक्रम कलेजका प्रबन्ध निर्देशक शहनवाज अन्सारी, एकेडेमिक डाइरेक्टर डा. रुबी श्रेष्ठ यशमिन तथा एडमिशन अफेयर्स र मार्केटिङ डाइरेक्टर अबिद हुसैन अन्सारीको हातबाट सम्पन्न भएको थियो।
कार्यक्रममा मदरसा बर्खुलउलूम छपकैया, यतीम खाना छपकैया, मदरसा मदिना जामे मस्जिद, मदरसा दारुल उलूम, यतीम खाना बहुअरी, मदरसा सनवरिया पोखरिया, यतीम खाना इनरुवा, मदरसा दुर्गालिया, मदरसा चेटा, मदरसा मदनिया सिरसिया, लिपन मदरसा, मदरसा कलेया इनरुवा, सोनबरसा मदरसा, गोनपुर गफुरिया मदरसा तथा एगाज निकाह मदरसा लगायतका विद्यार्थी र शिक्षकहरूले सहभागिता जनाएका थिए।
उक्त अवसरमा वरिष्ठ प्रशासक विश्वनाथ कान्त, मौलाना नुरुल होदा तथा प्रशासन अधिकृत पप्पु सिंहको पनि उपस्थिति रहेको थियो। कलेजले सामाजिक उत्तरदायित्व र समुदाय सेवा गर्ने आफ्नो प्रतिबद्धता यस कार्यक्रममार्फत देखाएको जनाएको छ।
