वीरगंज । पर्सा–३ बाट नेकपा एमालेका उम्मेदवार बनेर पराजित भएका रुपेश कुमार पाण्डेयले अब चुनाव नलड्ने पूर्वमन्त्री तथा कांग्रेस नेता रमेश रिजालको घोषणाको प्रशंसा गरेका छन्।
शनिबारमात्रै पर्सा–४ का पूर्वसांसद तथा पूर्वमन्त्री रमेश रिजालले कांग्रेस क्षेत्रीय कार्यकर्ता भेलामा अब आफैं चुनाव नलड्ने घोषणा गरेका थिए । यस घोषणाप्रति एमाले नेता पाण्डेयले सामाजिक सञ्जालमार्फत आफ्नो सम्मान व्यक्त गरेका हुन्।
फेसबुकमा शनिबार अपरान्ह पोष्ट गर्दै पाण्डेयले लेखेका छन्, “राजनीतिक विचार र सिद्धान्त फरक भएपनि आदरणीय रमेश रिजाल दाईलाई यो नैतिकता र त्यागका लागि सलाम छ। पर्सा जिल्लाको विकास र समृद्धिका लागि रिजालले सकेको जति गरेका छन् र अबको समय युवा पुस्ताको हो भन्ने जनमतलाई कदर गर्दै मैले अब चुनाव नलड्ने रिजालको घोषणाप्रति सम्मान व्यक्त गर्दछु।”
उनले थप लेखेका छन्, “आदरणीय अभिभावक रमेशदाईले समयको मागसँगै युवा पुस्ताका लागि मार्ग प्रशस्त गर्नु परिपक्व राजनीतिज्ञको उदाहरण हो, जसलाई पर्सा जिल्लाका अन्य आदरणीय नेताहरूले पनि अनुशरण गर्नेछन् भन्ने अपेक्षा गर्दछु।”
