वीरगंज । मधेश प्रदेशका मुख्य मन्त्री कृष्ण प्रसाद यादवले प्रदेश सरकारलाई संविधानले दिएको अधिकार पूर्ण रूपमा कार्यान्वयन भए मधेस प्रदेशका धेरै समस्या प्रदेशबाटै समाधान गर्न सकिने बताउनुभएको छ।
जनकपुरमा निर्माण गरिने मधेस प्रदेश प्रहरी कार्यालय भवनको शनिबार शिलान्यास गर्दै मुख्यमन्त्री यादवले संघीय व्यवस्थाको प्रभावकारी कार्यान्वयन भए मधेसका नागरिकले आफ्ना अधिकार प्राप्तिका लागि बारम्बार काठमाडाैं धाउन नपर्ने उल्लेख गर्नुभयो।
उहाँले प्रदेश सरकारले शिक्षा, स्वास्थ्य, कृषि, पूर्वाधार र रोजगारीका क्षेत्रलाई प्राथमिकतामा राखेर ती क्षेत्रको विकासका लागि निरन्तर प्रयास गरिरहेको बताउनुभयो।
पर्याप्त स्रोतसाधनको अभावका कारण जनअपेक्षा अनुसार काम गर्न केही कठिनाइ भइरहेको उहाँको भनाइ थियो। मधेस प्रदेशको समग्र विकासलाई केन्द्रमा राखेर प्रदेश सरकारले आफ्ना कार्यक्रमहरू अघि बढाइरहेको पनि मुख्यमन्त्री यादवले बताउनुभयो।
