वीरगंज । मधेस तराईकै पहिलो रेडियो, रेडियो वीरगंजले बिहिबार पर्सा जिल्लाबाट नवनिर्वाचित चारै जना प्रतिनिधिसभा सदस्यलाई सम्मान गरेको छ।
रेडियो वीरगंज, टिभी वीरगंज र मधेशदृष्टिका कार्यकारी अध्यक्ष ध्रुव साहको अध्यक्षतामा आयोजित कार्यक्रममा यही फागुन २१ गते सम्पन्न प्रतिनिधिसभा सदस्य निर्वाचनमा राष्ट्रिय स्वतन्त्र पार्टी (रास्वपा)बाट निर्वाचित पर्सा क्षेत्र नम्बर–१ का हरि पन्त, क्षेत्र नम्बर–२ का सुशिल कुमार कानु, क्षेत्र नम्बर–३ का रामाकान्त चौरसिया र क्षेत्र नम्बर–४ का टेक बहादुर शाक्यलाई सम्मान गरिएको हो।
सम्मान ग्रहण गर्दै पर्सा–१ का नवनिर्वाचित सांसद हरि पन्तले जनताको भरोसा कहिल्यै टुट्न नदिने प्रतिबद्धता व्यक्त गरे। उनले वीरगंजस्थित ठाकुर राम क्याम्पस, नारायणी अस्पताल तथा नारायणी रंगशालाको स्तरोन्नति आफ्नो प्राथमिकतामा रहेको बताए।
पर्सा–२ का सांसद सुशिल कुमार कानुले पर्सा जिल्लाको विकासका लागि चारै जना सांसद मिलेर साझा योजना बनाएर अघि बढ्ने बताए। उनले वीरगंजको नारायणी अस्पताल, नारायणी रंगशाला तथा क्षेत्र नम्बर–१ देखि ४ सम्मका सडक पूर्वाधार विकासका विषयमा संयुक्त योजना तयार गरी काम गर्ने प्रतिबद्धता व्यक्त गरे।
त्यसैगरी पर्सा–३ का सांसद रामाकान्त चौरसियाले वीरगंजस्थित पुरानो चिनिमिल रहेको स्थानमा पुनः चिनिमिल सञ्चालन गर्ने अवस्था नरहेको बताए। उनले साे चिनिमिल रहेकाे जग्गा बिक्री गरेर पर्साको ग्रामीण क्षेत्रमा नयाँ जग्गा खरिद गरी चिनिमिल सञ्चालन गर्नुपर्ने धारणा राखे।
पर्सा–४ का सांसद टेक बहादुर शाक्यले ठोरी क्षेत्रलाई मधेस प्रदेशकै महत्वपूर्ण पर्यटकीय गन्तव्यका रूपमा विकास गर्ने लक्ष्यसहित काम गर्ने बताए। साथै उनले ठोरीलाई वीरगंज र चितवनसँग जोड्ने अधुरो हुलाकी सडक निर्माण कार्य सम्पन्न गर्न पहल गरिने जानकारी दिए।
