वीरगंज । रौतहट निर्वाचन क्षेत्र नम्बर–२ बाट नेपाली कांग्रेसका डा. मो. फिरदोश आलम प्रतिनिधिसभा सदस्यमा विजयी हुनुभएको छ।
गत आइतबार सम्पन्न प्रतिनिधिसभा सदस्य निर्वाचनमा डा. आलमले २९ हजार ५२८ मत प्राप्त गर्दै विजय हासिल गर्नुभएको निर्वाचन अधिकृत सीताराम खड्काले जानकारी दिनुभयो।
उहाँका निकटतम प्रतिस्पर्धी नेपाल कम्युनिष्ट पार्टीका उम्मेदवार किरणकुमार साहले १८ हजार ४४२ मत प्राप्त गर्नुभएको छ। प्रतिनिधि सभा सदस्यमा निर्वाचित आलम पूर्व मन्त्री एवं कांग्रेसका नेता आफताब आलमका छाेरा हुन् ।
अन्तिम मतपरिणामअनुसार राष्ट्रिय स्वतन्त्र पार्टीका उम्मेदवार शेख सगिरले ९ हजार ३२५ मत प्राप्त गर्नुभएको छ भने जनता समाजवादी पार्टी, नेपालका उम्मेदवार रामअशिष राय यादवले २ हजार ९६० मत ल्याएर चौथो स्थान हासिल गर्नुभएको छ। नेकपा (एमाले)का उम्मेदवार मोहम्मद अतिउल्लाहले २ हजार ३८२ मत प्राप्त गर्नुभएको छ।
निर्वाचन अधिकृत खड्काका अनुसार उक्त क्षेत्रमा कुल १ लाख ८ हजार ८७२ मतदाता रहेकामा ७१ हजार ५४६ जनाले मतदान गरेका थिए। त्यसमध्ये ६६ हजार १४४ मत सदर भएका छन् भने ५ हजार ४०२ मत बदर भएका छन्।
