वीरगंज । पर्सा निर्वाचन क्षेत्र नम्बर ४ मा राष्ट्रिय स्वतन्त्र पार्टी (रास्वपा) का उम्मेदवार टेकबहादुर शाक्य विजयी भएका छन् । लामो समयदेखि स्थापित ठूला दलका प्रभावशाली नेताहरूलाई पछि पार्दै शाक्य प्रतिनिधिसभा सदस्यमा निर्वाचित भएका हुन् ।
शाक्यले २८ हजार ६ मत प्राप्त गर्दै आफ्ना निकटतम प्रतिद्वन्द्वी नेपाली कांग्रेसका रमेश रिजाललाई १५ हजार ४७२ मतान्तरले पराजित गरे । रिजालले १२ हजार ५३४ मत प्राप्त गरेका छन् । रिजाल आठौँ पटक संसदीय निर्वाचनमा प्रतिस्पर्धा गरेका पूर्वमन्त्रीसमेत हुन् ।
त्यस्तै नेकपा एमालेका उम्मेदवार जालिम मियाँ मन्सुरीले १२ हजार १४५ मत, जनता समाजवादी पार्टी (जसपा) नेपालका उम्मेदवार कृपासिन्धु चौधरी ४ हजार ७५८ मत र नेपाली कम्युनिस्ट पार्टी (नेकपा) का जयप्रकाश थारुले ३ हजार ११३ मत पाएका छन् ।
रिजाल नेपाली कांग्रेसबाट आठौँ पटक चुनावी मैदानमा उत्रिएका थिए भने मन्सुरी दोस्रो पटक एमालेबाट प्रतिस्पर्धामा थिए । जगरनाथपुर गाउँपालिकाका स्थायी बासिन्दा मन्सुरी २०७४ सालको स्थानीय तह निर्वाचनमा गाउँपालिका अध्यक्षमा निर्वाचित भएका थिए ।
जयप्रकाश थारु यसअघि २०७० सालको दोस्रो संविधानसभा निर्वाचनमा एमालेबाट विजयी भएका अनुभवी नेता हुन् ।
पर्साको ठोरी गाउँपालिका–४ विजयवस्तीका स्थायी बासिन्दा शाक्यले निर्वाचनअघि मात्रै पार्टी परिवर्तन गरी रास्वपाबाट टिकट पाएका थिए ।
