पर्सा ४ मा टेक बहादुर शाक्यको घरदैलो सम्पन्न, स्थानीयद्वारा परिवर्तनको पक्षमा मत दिने आश्वासन

वीरगंज । पर्सा निर्वाचन क्षेत्र नं. ४ अन्तर्गत ठोरी गाउँपालिका वडा नं. ३ मा राष्ट्रिय स्वतन्त्र पार्टी (रास्वपा) का प्रतिनिधिसभा सदस्य उम्मेदवार टेक बहादुर शाक्यको घरदैलो कार्यक्रम सम्पन्न भएको छ।

घरदैलोका क्रममा उम्मेदवार शाक्यले स्थानीय मतदातासँग प्रत्यक्ष भेटघाट तथा संवाद गरेका थिए । सो अवसरमा मतदाताहरूले गाउँमा देखिएका विभिन्न समस्या—सडक, खानेपानी, स्वास्थ्य सेवा, शिक्षा तथा रोजगारीका विषय—बारे आफ्ना गुनासा र सुझाव राखेका थिए ।

स्थानीयका समस्या ध्यानपूर्वक सुन्दै उम्मेदवार शाक्यले क्षेत्रका जटिल समस्याहरूलाई प्रतिनिधिसभामा प्रभावकारी रूपमा उठाउने र समाधानका लागि सम्बन्धित निकायसँग पहल गर्ने प्रतिबद्धता व्यक्त गरे । उनले ठोरीको समग्र विकासका लागि दीर्घकालीन योजना आवश्यक रहेको उल्लेख गर्दै जनताको साथ र विश्वासले आफूलाई थप ऊर्जा मिलेको बताए ।

घरदैलो अभियानका क्रममा स्थानीय बासिन्दाहरूले फूलमाला र अबिरको टीका लगाएर उम्मेदवार शाक्यको भव्य स्वागत गरेका थिए । स्वागत कार्यक्रममा सहभागीहरूले यस पटकको निर्वाचनमा परिवर्तनका लागि रास्वपालाई मत दिने आश्वासन समेत दिएका थिए ।

यसैबीच, घरदैलो कार्यक्रमकै क्रममा केही स्थानीय व्यक्तिहरू अन्य पार्टी परित्याग गरी रास्वपामा प्रवेश गरेको रास्वपाका नेता पशुराम साहले जानकारी दिए । पार्टी प्रवेश गर्नेहरूलाई उम्मेदवार शाक्यले स्वागत गर्दै संगठन सुदृढीकरणमा सक्रिय भूमिका खेल्न आग्रह गरेका थिए ।