वीरगंज । नेकपा एमालेका उम्मेदवार रुपेशकुमार पाण्डेयले आफ्नो चुनावी एजेन्डाले पर्सा क्षेत्र नं. ३ का समग्र समस्यालाई सम्बोधन गर्ने दाबी गरेका छन् । उनले रोजगारी, उद्योग, कृषि, स्वास्थ्य, शिक्षा र पूर्वाधार विकासलाई प्राथमिकतामा राखेर कार्यक्रम अघि सारेको बताए ।
रोजगारी तथा उद्योग क्षेत्रतर्फ स्वदेशमै रोजगारी सिर्जना गर्ने विशेष कार्यक्रम सञ्चालन गरिने, साना तथा मझौला उद्योगलाई सहुलियत ऋणको व्यवस्था मिलाइने तथा स्टार्टअप र सूचना प्रविधि क्षेत्रमा युवालाई प्रोत्साहन गरिने उनको भनाइ छ। “युवालाई विदेशिन बाध्य हुने अवस्था अन्त्य गर्न स्थानीयस्तरमै अवसर सिर्जना गर्नुपर्छ,” उनले उल्लेख गरे ।
कृषि तथा पशुपालनतर्फ कृषिको आधुनिकीकरण र मेकानाइजेसन, मल र उन्नत बीउमा अनुदान, साथै युवालाई कृषि उद्यममा आकर्षित गर्ने कार्यक्रम सञ्चालन गरिने उनले बताए । यसले उत्पादन वृद्धि र किसानको आम्दानी बढाउने विश्वास उनले व्यक्त गरे ।
स्वास्थ्य क्षेत्रमा जिल्ला अस्पताल सुदृढीकरण, निःशुल्क आधारभूत स्वास्थ्य सेवा विस्तार र स्वास्थ्य बिमा कार्यक्रमलाई प्रभावकारी बनाउने योजना रहेको उनले जानकारी दिए । शिक्षा क्षेत्रतर्फ सार्वजनिक विद्यालय सुधार कार्यक्रम, प्राविधिक तथा व्यावसायिक शिक्षामा जोड र डिजिटल शिक्षाको विस्तारलाई प्राथमिकता दिइएको उनले स्पष्ट पारे ।
पूर्वाधार विकासतर्फ सडक र पुल निर्माणलाई तीव्रता दिने, जलविद्युत् आयोजना अघि बढाउने, सिँचाइ तथा खानेपानी परियोजना विस्तार गर्ने योजना रहेको पाण्डेयले बताए । सामाजिक सुरक्षातर्फ वृद्धभत्ता तथा अन्य सामाजिक सुरक्षा भत्ता निरन्तरता र गरिबी निवारण कार्यक्रमलाई थप सशक्त बनाइने उनको प्रतिबद्धता छ ।
उनले मतदातालाई विकास, सुशासन र समृद्धिका लागि आफूलाई समर्थन गर्न आग्रह गरेका छन् ।
