वीरगंज । नेपालका न्युरोसर्जनहरूको साझा संस्था नेपाली न्युरोसर्जन समाज (NESON) को सम्मेलन वीरगंजमा सम्पन्न भएकाे छ । क्लार्क रिसोर्ट्स वीरगंजमा सम्पन्न सम्मेलनको मुख्य विषय “मधेसी प्रदेशमा न्युरो सर्जरीका सेवाहरू” रहेको थियो। कार्यक्रम बाराको एल.एस. न्युरो एन्ड जेनरल अस्पतालको आयोजनामा सञ्चालन गरिएको थियो।
आयोजकका अनुसार सम्मेलनको उद्देश्य मधेस प्रदेश, बारा र पर्सा जिल्लामा मस्तिष्क तथा स्नायु सम्बन्धी उपचार सेवाको अवस्था, उपलब्ध सुविधा, चुनौती र आगामी सम्भावनाहरूको खुला छलफल गर्नु थियो । नेपालभरिका न्युरोसर्जन, चिकित्सक, स्वास्थ्यकर्मी तथा मेडिकल विद्यार्थीहरूको उल्लेख्य सहभागिता रहेको थियो । एल.एस. न्युरो एन्ड जेनरल अस्पतालका संचालक रामप्रबेश प्रसाद कुर्मीका अनुसार यस्तो सम्मेलनले चिकित्सकहरूबीच अनुभव साटासाट गर्न सहयोग पुग्ने र बिरामीको उपचारमा प्रभावकारी सेवा दिन मद्दत गर्ने विश्वास गरिएको छ।
कार्यक्रममा विभिन्न विषयमा विशेषज्ञ चिकित्सकहरूले प्रस्तुति राखेका थिए । एल.एस. न्युरो एन्ड जेनरल अस्पतालका मेडिकल निर्देशक डा. अर्जुन पटेलले बारा–पर्सामा न्युरोसर्जरी सेवाको इतिहास र विकासक्रमबारे जानकारी दिएका थिए भने वरिष्ठ न्युरो सर्जन डा. सञ्जीव कुमार झाले अस्पतालका उपलब्धि, उपचार प्रक्रिया र प्रविधिबारे प्रस्तुति दिएका थिए।
त्यस्तै, डा. विपिन चौरसिया ले न्युरो सर्जरीमा जर्नल प्रकाशनका चुनौतीहरूबारे चर्चा गरे भने डा. अजय कुमार गुप्ताले आकस्मिक पक्षघात (एक्युट इस्केमिक स्ट्रोक) को उपचार अनुभव प्रस्तुत गरे । वरिष्ठ फिजियोथेरापिस्ट उदय मिश्रले न्युरो पुनर्स्थापना (स्नायु पुनर्स्थापना) का प्रोटोकलबारे जानकारी दिएका थिए ।
आयोजक संस्थाले मधेस प्रदेश, बारा र पर्सामा गुणस्तरीय न्युरोसर्जरी सेवा विस्तार गर्ने लक्ष्य राख्दै स्थानीय चिकित्सकलाई अद्यावधिक ज्ञान र सीप प्रदान गर्ने उद्देश्य राखेको बताएकाे छ । सम्मेलनले चिकित्सकबीच सहकार्य बढाउने, स्थानीय स्तरमै जटिल उपचार सम्भव बनाउने र बिरामीलाई काठमाडौँ जानुपर्ने बाध्यता कम गर्ने विश्वास गरिएको छ ।
