वीरगंज । प्रतिनिधिसभा निर्वाचन नजिकिँदै जाँदा पर्सा क्षेत्र नम्बर–१ मा चुनावी सरगर्मी बढ्दो छ। यसैबीच राष्ट्रिय स्वतन्त्र पार्टी (रास्वपा) का उम्मेदवार हरि पन्तले आफ्नो चुनावी अभियानलाई थप आक्रामक र व्यवस्थित बनाएका छन्।
वीरगञ्ज महानगरपालिका–हरपतगन्जमा आयोजित कोणसभामा पन्तले मतदातासामु आफ्नो चुनावी एजेन्डा प्रस्तुत गर्दै पुराना राजनीतिक दलप्रति असन्तुष्टि व्यक्त गरे। महेश यादवको सभापतित्वमा सम्पन्न सभामा उनले विगतका सरकारले जनअपेक्षाअनुसार काम गर्न नसकेको आरोप लगाए।
“पुरानै राजनीतिक शैलीबाट देशको समुचित विकास सम्भव छैन,” पन्तले भने, “नयाँ सोच, स्पष्ट भिजन र जनउत्तरदायी नेतृत्व आवश्यक छ। रास्वपा त्यसैका लागि चुनावी मैदानमा उत्रिएको हो।”
उनले मतदातालाई यसपटक मत परिवर्तनमार्फत देशमा ठोस परिवर्तनको आधार तयार गर्न आग्रह गरे। कार्यक्रममा सहभागी स्थानीय वक्ताहरूले यसपटक ‘घण्टी’ छापका उम्मेदवार पन्तलाई विजयी गराउन प्रतिबद्ध रहेको जनाए। उनीहरूले क्षेत्रीय विकास, रोजगारी सृजना र सुशासनका लागि पन्त नै उपयुक्त विकल्प भएको दाबी गरे।
यसैगरी, जगरनाथपुर मा पनि रास्वपाले कोणसभा सम्पन्न गरेको छ। पार्टीका संयोजक युवराज पटेलको अध्यक्षतामा सम्पन्न कार्यक्रममा जिल्ला सभापति समेत रहेका उम्मेदवार पन्त प्रमुख अतिथिका रूपमा सहभागी भए।
पन्तले मन्तव्य राख्दै ‘घण्टी’ छापमा मतदान गर्न आग्रह गरे। उनले पुराना दलका नीतिका कारण युवाहरू विदेशिन बाध्य भएको उल्लेख गर्दै रास्वपाको विजयले मात्र औद्योगिक पुनर्जागरण सम्भव हुने दाबी गरे।
“वीरगञ्जका पुराना चिनी कारखानालगायत बन्द उद्योग पुनः सञ्चालन गर्ने स्पष्ट भिजन हामीसँग छ,” उनले भने। कार्यक्रममा सगीर अन्सारी, शिवजी ठाकुर, आनन्द शास, भगवान गिरी, नन्दु कुर्मी, उपेन्द्र पटेललगायत युवाहरूको सक्रिय सहभागिता रहेको थियो।
यता शुक्रबार बिहान भेडिआही मा उम्मेदवार पन्तले घरदैलो कार्यक्रम सम्पन्न गरेका छन्। घरदैलोका क्रममा स्थानीयले यसपटक पन्तलाई संसद्मा पुर्याउन सहयोग गर्ने आश्वासन दिएका छन्।
कार्यक्रमका क्रममा नेपाल कम्युनिस्ट पार्टी (एमाले) का कार्यकर्तासँग सामान्य तनावको स्थिति सिर्जना भए पनि पार्टीका नेता–कार्यकर्ताको सुझबुझ र सुरक्षाकर्मीको सक्रियताबाट सम्भावित भिडन्त टरेको बताइएको छ।
निर्वाचन नजिकिँदै जाँदा पन्तले घरदैलो, टोलसभा र युवाकेन्द्रित अन्तरक्रियामार्फत प्रत्यक्ष संवादलाई अझै सशक्त बनाउने रणनीति लिएको बताएका छन्।
पर्सा–१ मा पुराना दल र नयाँ शक्तिबीचको प्रतिस्पर्धा रोचक बन्दै गइरहेका बेला हरि पन्तको सक्रियता रास्वपाको चुनावी अभियानलाई उकालोमा पुर्याइरहेको देखिन्छ। अब मतदाताको निर्णयले क्षेत्रको राजनीतिक भविष्य निर्धारण गर्नेछ।
