वीरगंज । राष्ट्रिय स्वतन्त्र पार्टी (रास्वपा) बाट पर्सा निर्वाचन क्षेत्र नम्बर–२ का प्रतिनिधिसभा सदस्य उम्मेदवार सुशील कुमार कानुले शनिवार विभिन्न क्षेत्रमा घरदैलो अभियान सञ्चालन गरेका छन्।
उनले वीरगञ्ज महानगरपालिका–२९ बसडिलवा र बहुदरमाई नगरपालिका–२ सीसीयाडी क्षेत्रमा पुगेर मतदातासँग प्रत्यक्ष भेटघाट गरेका थिए। घरदैलोका क्रममा उनले कुशासन र भ्रष्टाचार अन्त्य गर्दै सुशासन स्थापना गर्न घण्टी चुनाव चिन्हमा मतदान गर्न आग्रह गरे।
कानुले विगत चार दशकदेखि चल्दै आएको राजनीतिक चक्रव्यूह तोडेर विधिको शासन स्थापना गर्ने, जनताको जीवनस्तर उकास्ने र समृद्ध नेपाल निर्माण गर्ने लक्ष्यसहित रास्वपा चुनावी मैदानमा उत्रिएको बताए। “पर्सा जिल्लामा देशकै आर्थिक नगरी वीरगञ्ज पर्छ। भौगोलिक तथा कूटनीतिक दृष्टिकोणले समेत यो क्षेत्र महत्त्वपूर्ण छ,” उनले भने, “तर यहाँबाट निर्वाचित प्रतिनिधिहरूको बेवास्ताका कारण अपेक्षित विकास हुन सकेन।”
उनले शिक्षा, स्वास्थ्य, पूर्वाधार र सडकको अवस्था जीर्ण रहेको उल्लेख गर्दै अघिल्ला प्रतिनिधिहरूले व्यक्तिगत स्वार्थमा केन्द्रित राजनीति गरेको आरोप लगाए। निर्वाचित भए रास्वपा नेतृत्वको सरकारले पर्साको कायापलट गर्ने गरी ठूला विकास योजना ल्याउने प्रतिबद्धता व्यक्त गरे।
कृषि, शिक्षा, स्वास्थ्य र पूर्वाधारलाई प्राथमिकतामा राखी आधारभूत आवश्यकतामा केन्द्रित कार्यक्रम सञ्चालन गर्ने उनको योजना छ। किसानलाई समयमै मल उपलब्ध गराउने व्यवस्था मिलाइने र युवालाई सीपमूलक तालिम दिई स्थानीय स्तरमै रोजगारी सिर्जना गरिने उनले बताए। “युवाले गाउँमै अवसर पाए वैदेशिक रोजगारीको बाध्यता घट्छ,” उनले भने।
घरदैलोका क्रममा स्थानीय बासिन्दाले शिक्षा, स्वास्थ्य, सडक र खानेपानी समस्याबारे गुनासो गरेका थिए। जवाफमा कानुले जनताको आवाज संसद्मा सशक्त रूपमा उठाउने र ठोस परिणाम देखिने गरी काम गर्ने प्रतिबद्धता दोहोर्याए।
कार्यक्रममा सहभागी युवाहरूले परिवर्तनको समय आएको भन्दै रास्वपाप्रति आकर्षण बढ्दै गएको बताएका थिए। ज्येष्ठ नागरिक तथा महिलाहरूले पनि यसपटक सोचेर मतदान गर्ने र सुशासन तथा जबाफदेहितालाई प्राथमिकता दिने प्रतिक्रिया दिएका थिए।
