वीरगंज । पर्सा निर्वाचन क्षेत्र नम्बर १ बाट प्रतिनिधिसभा सदस्यका लागि Ujyaalo Nepal Party का उम्मेदवार रामकिशोर सिंह (पराग)ले वीरगञ्ज महानगरपालिका वडा नम्बर २१ अन्तर्गत परवानीपुर, ताजपुर, कोइरिया टोल तथा ततवा टोलमा घरदैलो कार्यक्रम सम्पन्न गरेका छन्।
घरदैलो कार्यक्रमका क्रममा स्थानीयवासी तथा युवाहरूले उम्मेदवार सिंहलाई फूलमाला र खादा लगाई भव्य स्वागत गरेका थिए। कार्यक्रममा स्थानीयहरूको उल्लेखनीय सहभागिता रहेको थियो।
भेटघाटका क्रममा स्थानीयवासी तथा युवाहरूले विगतका राजनीतिक दल तथा उम्मेदवारहरूले चुनावको समयमा आश्वासन मात्र दिने तर विकास निर्माण र रोजगारी सिर्जनामा ठोस उपलब्धि हासिल गर्न नसकेको गुनासो गरेका थिए। निर्वाचनपछि जनतासँग सम्पर्कविहीन हुने प्रवृत्तिको अन्त्य गर्नुपर्ने उनीहरूको धारणा थियो। सक्षम र नयाँ उम्मेदवारलाई आगामी निर्वाचनमा साथ दिने प्रतिबद्धता पनि स्थानीयहरूले व्यक्त गरेका थिए।
स्थानीयहरूले कुलमान घिसिंगलाई काम गर्ने नेतृत्वका रूपमा प्रशंसा गर्दै उम्मेदवार सिंहप्रति समर्थन जनाएका थिए।
उम्मेदवार सिंहले आफू निर्वाचित भएलगत्तै स्थानीयवासीका समस्या समाधान गर्ने प्रतिबद्धता व्यक्त गरे। गाउँ–गाउँमा शिक्षा, स्वास्थ्य तथा रोजगारीलाई प्राथमिकतामा राखेर विकासका कार्यक्रम अघि बढाइने उनले बताए। साथै, स्थानीय स्तरमै कलकारखाना स्थापना गरी योग्य तथा सक्षम व्यक्तिहरूलाई रोजगारी प्रदान गर्ने योजना रहेको जानकारी दिए।
वीरगञ्ज महानगरपालिका वडा नम्बर २० मा निर्वाचित भई प्राप्त अनुभवलाई संघीय संसदसम्म पुर्याई क्षेत्रको समग्र विकासका लागि प्रभावकारी आवाज उठाउने प्रतिबद्धता समेत उनले व्यक्त गरे।
कार्यक्रमको अन्त्यमा स्थानीयवासीहरूले उम्मेदवार सिंहलाई विजयको अग्रिम शुभकामना व्यक्त गर्दै आगामी निर्वाचनमा पूर्ण साथ र समर्थन रहने विश्वास व्यक्त गरेका थिए।
