वीरगंज । नेकपा एमालेका तर्फबाट पर्सा निर्वाचन क्षेत्र नं. ३ का प्रतिनिधिसभा सदस्य पदका उम्मेदवार रुपेश पाण्डेले मंगलबार बहुदरमाई नगरपालिकाको पटनी गाउँमा घरदैलो तथा मतदाता भेटघाट कार्यक्रम सम्पन्न गरेका छन्।
घरदैलोका क्रममा उम्मेदवार पाण्डेले स्थानीय मतदातासँग प्रत्यक्ष संवाद गर्दै जनताका समस्या सुन्नुका साथै समाधानका लागि प्रतिबद्धता व्यक्त गरे। उनले आफ्नो चुनाव चिन्ह ‘सूर्य छाप’मा मतदान गरी विजयी बनाउन आग्रह गर्दै निर्वाचित भएपछि क्षेत्रका मुद्दा संसदसम्म पुर्याएर समाधान खोज्ने बताए।
पाण्डेले विभिन्न मन्त्रालय तथा दातृ निकायसँग समन्वय गरेर क्षेत्रको विकासलाई तीव्रता दिने आश्वासन दिए। उनले पर्सा–३ का जनताले विगतमा धोखा खेप्नुपरेको उल्लेख गर्दै अब सचेत भएर निर्णय गर्नुपर्ने धारणा राखे। आफू विगत तीन वर्षदेखि क्षेत्रका जनताका समस्या बुझ्दै आएको र सधैं सुख–दुःखमा साथ रहने प्रतिबद्धता समेत उनले जनाए।
कार्यक्रममा बहुदरमाई नगरपालिकाका मेयर सिंगासन साह तेली, नेता शिव पटेल लगायत एमालेका स्थानीय नेता तथा कार्यकर्ताहरूको उल्लेखनीय उपस्थिति रहेको थियो।
