वीरगंज । राष्ट्रिय स्वतन्त्र पार्टीका पर्सा निर्वाचन क्षेत्र नं. ३ का प्रतिनिधिसभा सदस्य उम्मेदवार रामाकान्त चौरसियाले आफ्नो चुनावी प्रचारप्रसारलाई तीव्रता दिएका छन्। उनले शिक्षा, स्वास्थ्य, विकास, सुशासन र रोजगारी सिर्जनालाई चुनावी एजेण्डाको केन्द्रमा राख्दै अभियानलाई गति दिएका हुन्।
प्रचारप्रसारको क्रममा चौरसियाले मंगलबार सखुवाप्रसौनी गाउँपालिकाका विभिन्न वडामा घरदैलो कार्यक्रम सञ्चालन गरी मतदाता भेटघाट तथा प्रत्यक्ष संवाद गरे। कार्यक्रममा उनले स्थानीय बासिन्दासँग सडक, ढल निकास, फोहोर व्यवस्थापन, खानेपानी आपूर्ति तथा सुरक्षासम्बन्धी गुनासाहरू प्रत्यक्ष सुने।
उम्मेदवार चौरसियाले यस्ता समस्या अस्थायी योजनाबाट समाधान नहुने उल्लेख गर्दै दीर्घकालीन पूर्वाधार विकास योजनाको आवश्यकता औंल्याए। संघीय संसद्मा निर्वाचित भएपछि क्षेत्रका समस्यालाई प्राथमिकतामा राखी सम्बन्धित मन्त्रालय र निकायसँग समन्वय गरेर स्थायी समाधानका लागि पहल गर्ने प्रतिबद्धता उनले जनाए।
घरदैलो कार्यक्रममा सहभागी मतदाताले विकासका आश्वासनभन्दा कार्यान्वयनमा जोड दिन आग्रह गरेका थिए। त्यसप्रति प्रतिक्रिया दिँदै चौरसियाले निर्वाचनपछि नियमित जनसम्पर्क, सार्वजनिक सुनुवाइ तथा प्रगति प्रतिवेदनमार्फत नागरिकलाई जानकारी गराउने प्रणाली विकास गर्ने आश्वासन दिए।
