वीरगंज । पर्सा निर्वाचन क्षेत्र नम्बर–३ अन्तर्गत बहुदरमाई नगरपालिका वडा नम्बर–१ बिश्रामपुरमा मंगलबार नेपाल कम्युनिष्ट पार्टी (एमाले)को चुनावी घरदैलो तथा जनसंवाद कार्यक्रम सम्पन्न भएको छ।
एमालेका प्रतिनिधिसभा सदस्य उम्मेदवार रूपेश कुमार पाण्डे पार्टीका नेता–कार्यकर्तासहित बिश्रामपुर पुग्दा स्थानीय बासिन्दाले स्वागत गर्दै समर्थन जनाएका थिए। घरदैलोका क्रममा आयोजित जनसंवाद कार्यक्रममा पाण्डेले मुलुकको विकास र समृद्धिको स्पष्ट खाका एमालेसँग मात्र रहेको दाबी गर्दै ढुक्क भएर एमालेका पक्षमा मतदान गर्न आग्रह गरे।
पर्सा–३ का हरेक गाउँ र टोलमा पुगेर जनताका समस्या र अपेक्षा बुझिसकेको उल्लेख गर्दै उनले भने, “राजनीतिमा नयाँ छु, तर क्षेत्रका जनताको समस्याबारे जानकार छु। यहाँको कृषि, शिक्षा, स्वास्थ्य र रोजगारीलाई प्राथमिकतामा राखेर काम गर्नेछु।” उनले आफू भाषणका लागि नभई जनताको काम गर्न राजनीतिमा आएको स्पष्ट पारे।
पाण्डेले जनताको बीचमै रहेर सेवा गर्ने प्रतिबद्धता व्यक्त गरे। कार्यक्रममा एमालेका स्थानीय नेता–कार्यकर्ताहरूको उल्लेख्य सहभागिता रहेको थियो।
