वीरगंज । जिल्ला प्रशासन कार्यालय, पर्साले वीरगंज महानगर क्षेत्रमा जारी कर्फ्यू आदेश हटाएको छ । प्रमुख जिल्ला अधिकारी भोला दाहालद्वारा जारी सूचनाअनुसार समग्र शान्ति–सुरक्षाको अवस्था विश्लेषण गर्दा परिस्थिति क्रमशः सुधार हुँदै गएको निष्कर्षसहित कर्फ्यू आदेश आज साँझ ४:३० बजेदेखि लागू हुने गरी हटाइएको हो।
जिल्ला सुरक्षा समितिको निर्णय तथा सर्वपक्षीय बैठकको निष्कर्षका आधारमा कर्फ्यूलाई निरन्तरता दिनु आवश्यक नदेखिएको प्रशासनले जनाएको छ। यद्यपि अवस्था पूर्ण रूपमा सामान्य भइनसकेको भन्दै स्थानीय प्रशासन ऐन, २०२८ को दफा ६ (३क) बमोजिम केही संवेदनशील क्षेत्रमा निषेधाज्ञा आदेश जारी गरिएको छ।
प्रशासनका अनुसार मिति २०८२/११/११ गते बेलुकी ६:०० बजेदेखि २०८२/११/१२ गते बिहान ८:०० बजेसम्मका लागि तोकिएका क्षेत्रहरूमा कुनै पनि प्रकारका भेला, सभा, जुलुस तथा प्रदर्शन गर्न नपाइनेछ। आदेश उल्लंघन गर्नेलाई नियन्त्रणमा लिई कानुन बमोजिम कारबाही गरिने चेतावनी समेत दिइएको छ।
वीरगंजकाे बाईपास रोड, रानीघाट पुल, पावरहाउस चौक र घण्टाघर चौक क्षेत्र भित्र निषेधाज्ञा लागू हुने प्रशासनले जनाएको छ।
