वीरगंज । जिल्ला प्रशासन कार्यालय पर्सामा आज सर्वपक्षीय बैठक सम्पन्न भएको छ। आइतबार साँझ वीरगंज महानगरपालिका वडा नं. ११ श्रीपुरमा भएको घटनापछि पर्साका प्रमुख जिल्ला अधिकारी **भोला दाहाल**द्वारा जारी कर्फ्यू आदेशको सन्दर्भमा निकास खोज्न सोमबार दिउँसो बैठक बसेको हो।
बैठकले श्रीपुरमा २०८२/११/१० गते बेलुकी भएको घटना तथा त्यसबाट उत्पन्न घटनाक्रमका दोषी पक्षलाई स्थानीय प्रशासनले कानुनी दायरामा ल्याउने निर्णय गरेको छ। सोका लागि पीडित पक्षबाट जाहेरी लिई आवश्यक प्रक्रिया यथाशीघ्र अघि बढाइने जनाइएको छ। दोषीलाई कानुनी दायरामा ल्याउन धार्मिक अगुवाहरूले समेत सहजीकरण गर्ने सहमति भएको प्रशासनले जनाएको छ।
यसैगरी व्यक्तिगत घटना वा दुर्घटनालाई लिएर धार्मिक तथा सामाजिक सद्भावमा खलल पुग्ने गरी भड्काउने, दुष्प्रचार गर्ने, सामाजिक सञ्जालमा भाइरल बनाउने तथा Hate Speech प्रसारण गर्नेलाई साइबर कानुन तथा प्रचलित कानुन बमोजिम तत्काल कारबाहीको दायरामा ल्याइने निर्णय गरिएको छ।
बैठकले आगामी दिनमा धार्मिक तथा सामाजिक सद्भाव कायम राख्न नागरिक समाज, राजनीतिक दल, मिडियाकर्मी, धार्मिक तथा सामाजिक अगुवाहरू एवम् जनप्रतिनिधिहरूले आ–आफ्नो संस्था वा निकायबाट संयमता र सद्भावका पक्षमा विज्ञप्ति प्रकाशन गर्ने निर्णयसमेत गरेको जिल्ला प्रशासन कार्यालय पर्साले जनाएको छ।
