वीरगंज । पर्सा निर्वाचन क्षेत्र नं. १ अन्तर्गत राष्ट्रिय स्वतन्त्र पार्टी (रास्वपा)का उम्मेदवार हरि पन्तले वीरगंज महानगरपालिका वडा नं. १८ भबानिपुरमा आयोजना गरेको घरदैलो तथा मतदाता भेटघाट कार्यक्रममा उत्साहजनक सहभागिता देखिएको छ। कार्यक्रममा जेन्जी, युवा, प्रौढ तथा ज्येष्ठ नागरिकसहित विभिन्न तह–तप्काका स्थानीयहरूको उल्लेखनीय उपस्थिति रहेको थियो।
घरदैलोका क्रममा उम्मेदवार पन्तले घर–घरमा पुगेर स्थानीयसँग प्रत्यक्ष संवाद गर्दै विकास, सुशासन र पारदर्शितासम्बन्धी आफ्ना धारणा राखे। विभिन्न पेशा, व्यवसाय तथा सामाजिक क्षेत्रमा आबद्ध व्यक्तिहरूको सहभागिताले कार्यक्रम थप उत्साहपूर्ण बनेको आयोजकहरूले बताएका छन्। स्थानीय स्तरमा प्रभाव राख्ने व्यक्तित्वहरूको उपस्थितिले चुनावी माहोल तातेको देखिएको थियो।
कार्यक्रममा सहभागी स्थानीयहरूले पुराना दलप्रति बढ्दो निराशा र वैकल्पिक शक्तिको खोजी नै आफ्नो निर्णयको मुख्य कारण रहेको बताए। उनीहरूले पारदर्शिता, सुशासन र युवा नेतृत्वप्रतिको प्रतिबद्धताले आफूहरूलाई रास्वपातर्फ आकर्षित गरेको उल्लेख गरे।
उम्मेदवार पन्तले मतदातासँगको भेटमा जनताको विश्वासलाई केन्द्रमा राखेर जिम्मेवार र परिणाममुखी राजनीति गर्ने प्रतिबद्धता व्यक्त गरेका थिए। उनले स्थानीय आवश्यकता र प्राथमिकताअनुसार नीति तथा योजना अघि बढाउने आश्वासन दिएका छन्।
