वीरगंज । नेशनल मेडिकल कलेज तथा शिक्षण अस्पताल, वीरगञ्जले आफ्नो संस्थागत सामाजिक उत्तरदायित्व (CSR) अन्तर्गत नेपाल प्रहरी प्रदेश कार्यालयलाई दुई सेट कम्प्युटर आवश्यक एक्सेसरिज तथा युपिएससहित सहयोग स्वरूप हस्तान्तरण गरेको छ। कार्यक्रम २०८२ साल फागुन १० गते कलेजको सम्मेलन हल, वीरगञ्ज–१५, पर्सामा सम्पन्न भएको हो।
प्रविधिगत पूर्वाधार सुदृढीकरणमार्फत सार्वजनिक सेवा प्रवाहलाई थप प्रभावकारी, व्यवस्थित तथा छिटोछरितो बनाउने उद्देश्यले उक्त सामग्री प्रदान गरिएको कलेजले जनाएको छ। यस सहयोगबाट प्रदेश प्रहरी कार्यालयको प्रशासनिक कार्यसम्पादन र सूचना व्यवस्थापन प्रणालीमा सुधार आउने विश्वास व्यक्त गरिएको छ।
हस्तान्तरण कार्यक्रममा कलेजका अध्यक्ष प्रा. डा. जैनुदिन अन्सारीले सामग्री हस्तान्तरण गर्नुभएको थियो भने वरिष्ठ प्रहरी उपरीक्षक शान्तिराज कोइरालाले ग्रहण गर्नुभएको थियो।
कार्यक्रममा एडमिसन अफेयर्स एण्ड मार्केटिङ डाइरेक्टर अबिद हुसैन अन्सारी, अस्पताल निर्देशक डा. इशरत जहाँ अन्सारी, प्रमुख सूचना अधिकृत इ. प्रदीप कुमार चौधरी तथा मार्केटिङ, प्रशासन र सञ्चारकर्मीहरूको उपस्थिति रहेको थियो।
कलेजले शिक्षा, स्वास्थ्य तथा सामाजिक क्षेत्रमा निरन्तर योगदान पुर्याउँदै समाज र सुरक्षा निकायबीच सहकार्य सुदृढ गर्ने प्रतिबद्धता पुनः व्यक्त गरेको जनाएको छ।
