वीरगंज । वीरगंज महानगरपालिका वडा नम्बर ११ श्रीपुरमा आइतबार बेलुकी दुई फरक समुदायबीचको विवादका कारण अवस्था तनावग्रस्त बनेको छ।
- Advertisement -
प्रहरीका अनुसार आइतबार साँझ केही युवाहरूबीच सामान्य विवाद भई कुटपिट भएपछि सोही विषयलाई लिएर तनाव उत्पन्न भएको हो। एउटै टोलका दुई समुदाय एकअर्कामाथि आक्रमणमा उत्रिएपछि स्थिति नियन्त्रणमा लिन नेपाल प्रहरी र सशस्त्र प्रहरी ठूलो संख्यामा परिचालन गरिएको छ।
एक समूहले प्रहरीको घेरा तोडेर अर्को समुदायतर्फ अगाडि बढ्न खोजेपछि प्रहरीले लाठीचार्ज गर्दै भीडलाई तितरवितर पारेको थियो। घटनापछि क्षेत्रमा सुरक्षा व्यवस्था कडा पारिएको छ।
अहिले पनि श्रीपुर क्षेत्रको अवस्था तनावपूर्ण रहेको प्रहरीले जनाएको छ। स्थिति सामान्य बनाउन सुरक्षाकर्मी परिचालन कायमै राखिएको छ।
