वीरगंज । राष्ट्रिय स्वतन्त्र पार्टी (रास्वपा) बाट पर्सा निर्वाचन क्षेत्र नं. २ का प्रतिनिधिसभा सदस्य पदका उम्मेदवार सुशील कुमार कानु ले पर्सागढी नगरपालिकाको झबराहा टोलमा घरदैलो कार्यक्रम सम्पन्न गरेका छन्।
घरदैलोका क्रममा उम्मेदवार कानुले स्थानीय मतदातासँग प्रत्यक्ष संवाद गर्दै घण्टी चुनाव चिन्हमा मतदान गर्न आग्रह गरे। उनले झबराहा टोलसहित आसपासका क्षेत्रमा अस्पतालको अभाव, खेलकुद पूर्वाधारको कमी तथा कृषकहरूले लामो समयदेखि भोग्दै आएको मल र सिँचाइ पानीको समस्यालाई गम्भीर रूपमा लिएको बताए।
“कृषि नै यहाँको मुख्य आधार हो,” कानुले भने, “किसानले समयमै मल र सिँचाइ पानी नपाएसम्म समृद्धिको कल्पना गर्न सकिँदैन।” उनले निर्वाचित भएमा कृषि, स्वास्थ्य र स्थानीय पूर्वाधार विकासलाई प्राथमिकतामा राखेर काम गर्ने प्रतिबद्धता व्यक्त गरे।
युवालाई लक्षित गर्दै उनले स्थानीय स्तरमै पशुपालनसम्बन्धी प्राविधिक तथा सीपमूलक तालिम सञ्चालन गर्ने, स्वरोजगार र रोजगारीका अवसर सिर्जना गर्ने योजना सार्वजनिक गरे। स्थानीय तहमै रोजगारीका अवसर विस्तार भएमा वैदेशिक रोजगारीमा जान बाध्य युवालाई आफ्नै गाउँ–ठाउँमै भविष्य निर्माण गर्न सहयोग पुग्ने उनको भनाइ थियो।
त्यसैगरी, प्रभावकारी अस्पताल व्यवस्थापन, आधारभूत स्वास्थ्य सेवामा सहज पहुँच तथा शिक्षाको गुणस्तर सुधार रास्वपाको प्रमुख एजेन्डा रहेको उल्लेख गर्दै कानुले जनताको आधारभूत आवश्यकतामा केन्द्रित विकास मोडेल आवश्यक रहेको बताए।
घरदैलोका क्रममा झबराहा र बढनिहार क्षेत्रका ज्येष्ठ नागरिकहरूले उम्मेदवार कानुलाई समर्थन जनाउँदै परिवर्तनको पक्षमा नारा लगाएका थिए। कार्यक्रममा बुद्धिजीवी, ज्येष्ठ नागरिक, युवा, महिला तथा कृषक समुदायको उल्लेखनीय सहभागिता रहेको थियो।
घरदैलो कार्यक्रमले झबराहा क्षेत्रमा रास्वपाप्रति बढ्दो आकर्षण र परिवर्तनको अपेक्षा झल्काएको सहभागीहरूको भनाइ थियो।
