वीरगंज । नेकपा (एमाले) पर्सा निर्वाचन क्षेत्र नं. २ की उम्मेदवार रिमा कुमारी यादव ले शुक्रबार पनि घरदैलो तथा मतदाता भेटघाट कार्यक्रमलाई निरन्तरता दिएकी छन्। उनले पर्सागढी नगरपालिका वडा नं. ५ अन्तर्गत बहुअरावा र हर्दियामा पुगेर घरदैलो कार्यक्रम सम्पन्न गरिन्।
घरदैलोका क्रममा उम्मेदवार यादवले मतदातासँग प्रत्यक्ष भेटघाट गर्दै उनीहरूको गुनासो तथा सुझाव सुनेकी थिइन्। स्थानीय समस्याबारे जानकारी लिँदै उनले क्षेत्रको समग्र विकासका लागि शिक्षा, स्वास्थ्य र कृषिलाई पहिलो प्राथमिकतामा राख्नुपर्ने आवश्यकता औंल्याइन्।
उम्मेदवार यादवले गुणस्तरीय शिक्षा, सहज तथा सुलभ स्वास्थ्य सेवा तथा आधुनिक कृषि प्रणालीमार्फत स्थानीय जनताको जीवनस्तर उकास्ने प्रतिबद्धता व्यक्त गरिन्।
कार्यक्रममा एमालेका केन्द्रिय सदस्य विजय सरावगी, नेता मुकेश द्विवेदी, गोकर्ण पाठक, सिंघासन साह, लियाकत अली, अजय साह, पूर्व वडा अध्यक्ष असलम आलम, अशोक यादव लगायतका स्थानीय नेता तथा कार्यकर्ताहरूको उल्लेखनीय सहभागिता रहेको थियो।
