वीरगंज । नेकपा एमाले ले पर्सा जिल्लाको निर्वाचन क्षेत्र नम्बर ३ मा पार्टीका उम्मेदवार रुपेश कुमार पाण्डेयलाई जिताउन चुनावी अभियान सुदृढ गर्न तीन जना शीर्ष नेतालाई खटाउने निर्णय गरेको छ।
पर्सा–३ मा उम्मेदवार पाण्डेयको पक्षमा जनलहर बढ्दै गएको निष्कर्षसहित पार्टी नेतृत्वले केन्द्रीय उपमहासचिव योगेश भट्टराई, अध्यक्ष केपी ओलीका राजनीतिक सल्लाहकार विष्णु रिमाल र केन्द्रीय सदस्य सुरेन्द्र पाण्डे लाई उक्त क्षेत्रमा परिचालन गर्ने निर्णय गरेको हो।
उम्मेदवार पाण्डेयका अनुसार तीनै जना नेता आगामी आइतबारदेखि पर्सा–३ मा आएर चुनावी अभियानमा सक्रिय रूपमा खटिनेछन्। चुनाव अवधिभर उनीहरू क्षेत्रमै रहेर संगठन परिचालन, चुनावी रणनीति तथा कार्यक्रम व्यवस्थापनमा प्रत्यक्ष निर्देशन र निगरानी गर्ने जनाइएको छ।
शीर्ष तहका नेताहरूको आगमनले आफ्नो जित थप सुनिश्चित हुने विश्वास व्यक्त गर्दै पाण्डेयले पर्सा–३ मा आयोजना हुने एमालेका प्रमुख चुनावी कार्यक्रमहरूमा तीनै जना नेताको सहभागिता रहने बताए। उनले अभियानलाई अझ प्रभावकारी बनाउँदै मतदातासँगको प्रत्यक्ष सम्पर्कलाई तीव्रता दिइने उल्लेख गरे।
