वीरगंज । पर्सा निर्वाचन क्षेत्र नम्बर २ की नेकपा (एमाले) उम्मेदवार रिमा कुमारी यादवले आफ्नो चुनावी प्रतिबद्धता पत्र सार्वजनिक गरेकी छन्। “समृद्ध नेपाल, सुखी नेपाली” को राष्ट्रिय लक्ष्यसँगै पर्सा–२ को चौतर्फी रूपान्तरणमा केन्द्रित कार्ययोजना अघि सारेको प्रतिबद्धता पत्रमा उल्लेख गरिएको छ।
प्रतिबद्धता पत्रमा उनले सचेत सांसदको रूपमा नीति निर्माण तहमा सक्रिय भूमिका निर्वाह गर्ने बताएकी छन् । संसदमा कानुन निर्माणका क्रममा मधेसको भू–धरातल, सीमावर्ती क्षेत्रका समस्या र पर्सावासीका आवश्यकतालाई प्रतिविम्बित गराउने गरी नीतिगत बहस गर्ने उनले जनाएकी छन् । साथै पर्सागढी गुरुयोजना र सिँचाइ आयोजना जस्ता ठूला योजनालाई राष्ट्रिय प्राथमिकतामा पार्न बजेट पैरवी गर्ने प्रतिबद्धता व्यक्त गरेकी छन्।
कृषि क्षेत्रतर्फ किसानमैत्री नीति, मल र बीउको स्थायी समाधान तथा कृषि उपजको भण्डारणका लागि चिस्यान केन्द्र निर्माणलाई प्राथमिकतामा राखिएको छ । कृषि अनुदान वास्तविक किसानसम्म सोझै पुग्ने व्यवस्था मिलाउन र कृषि बिमा सहज तथा प्रभावकारी बनाउन नीतिगत पहल गर्ने उल्लेख छ।
स्वास्थ्य र शिक्षामा गुणस्तरीय सुधारका लागि क्षेत्रभित्र विशेषज्ञ स्वास्थ्य सेवा विस्तार, उपकरण र दक्ष जनशक्तिको व्यवस्था तथा महिलाहरूको पाठेघर क्यान्सर परीक्षण र उपचारलाई निःशुल्क र प्रभावकारी बनाउने योजना समेटिएको छ।
विद्यालयहरूलाई प्रयोगात्मक तथा प्राविधिक शिक्षामा केन्द्रित गर्दै विषयगत शिक्षक दरबन्दी सुनिश्चित गर्ने प्रतिबद्धता पनि गरिएको छ।
सांस्कृतिक तथा पर्यटकीय धरोहर संरक्षणअन्तर्गत पर्सागढीको ऐतिहासिक पहिचानलाई प्रवर्द्धन गर्दै गुरुयोजनासहित पूर्वाधार विकास र विन्दवासिनी मन्दिर लगायत धार्मिक स्थलहरूलाई पर्यटन सर्किटमा जोड्ने योजना अघि सारिएको छ।
सुशासन र जनउत्तरदायित्वतर्फ “सांसदसँग सवाल” कार्यक्रममार्फत नियमित जनसंवाद, सार्वजनिक सुनुवाइ तथा सरकारी सेवामा पारदर्शिता र गुणस्तरमा कडा निगरानी गर्ने प्रतिबद्धता पत्रमा उल्लेख गरिएको छ।
उम्मेदवार यादवले विकास, सेवा र रोजगारीमुखी एजेन्डासहित सूर्य चिन्हमा मतदान गरी आफूलाई विजयी बनाउन मतदातासँग अपिल गरेकी छन्।
