वीरगंज । पर्साको जगरनाथपुर गाउँपालिका वडा नम्बर ४ मा बिहीबार नेपाली कांग्रेसका प्रतिनिधिसभा सदस्य उम्मेदवार रमेश रिजाल घरदैलो कार्यक्रममा सहभागी हुँदा स्थानीय मतदाताले स्वागत गर्दै समर्थन जनाएका छन्।
बिहीबार दिउँसो मत माग्ने क्रममा रिजाल घरघरमा पुग्दा घरभित्रबाट स्वस्फूर्त रूपमा निस्किएका महिला, युवा तथा बृद्धबृद्धाले टीका लगाएर स्वागत गरेका थिए। सो अवसरमा मतदातासँग प्रत्यक्ष संवाद गर्दै उम्मेदवार रिजालले स्थानीय बासिन्दाका समस्या, आवश्यकता र अपेक्षाबारे जानकारी लिँदै समाधानका लागि नेपाली कांग्रेस का योजना र प्रतिबद्धताबारे अवगत गराएका थिए।
घरदैलो कार्यक्रममा मधेस प्रदेशका वन तथा वातावरण मन्त्री शंकर चौधरी, कांग्रेसका जिल्ला सहसचिव नवीन सिंह, क्षेत्रीय सभापति श्रीकान्तप्रसाद यादव, क्षेत्रीय सचिव बलिष्टर अहमद, नेपाल महिला संघ पर्साकी सभापति किरण शर्मा, वडाध्यक्ष, वडा सदस्यका साथै कांग्रेसका स्थानीय नेता तथा कार्यकर्ताहरूको सहभागिता रहेको थियो।
कार्यक्रमका सहभागीहरूले घरदैलो अभियानले मतदातासँगको सम्बन्ध अझ सुदृढ बनाएको उल्लेख गर्दै आगामी निर्वाचनमा कांग्रेसका उम्मेदवारलाई विजयी गराउन सक्रिय रहने बताएका छन्।
